Solidariteit Beweging wil samewerking tussen SA en Hongarye bevorder

Die Solidariteit Beweging het die afgelope week saam met verteenwoordigers van verskillende bedrywe in Hongarye ʼn vereniging in Boedapest opgerig wat samewerking tussen Hongarye en Suid-Afrika sal bevorder. Dit volg nadat ʼn afvaardiging van die Beweging die afgelope twee weke met politici, sakeleiers, akademici en ander leiersfigure in Hongarye ontmoet het.

Die Hongaars-Suider-Afrikaanse Vriendskapsvereniging is formeel as ʼn vereniging by die owerhede in Hongarye geregistreer en sal verskeie projekte fasiliteer. Die Solidariteit Beweging het verlede jaar reeds besluit om sy Europese netwerk ook na Sentraal- en Oos-Europa uit te brei met ʼn eerste sterk fokus op die vier lande wat deel van die Visegrad-groep is, naamlik Pole, Hongarye, Slowakye en Tsjeggië. Die vriendskapsvereniging sal ʼn voltydse kantoor in Boedapest hê wat deur Hongare gefinansier word.

Tydens die onlangse besoek is met verskeie senior regeringsleiers in Boedapest oor uitdagings en geleenthede samesprekings gevoer. Volgens Jaco Kleynhans, hoof van Internasionale Skakeling by die Beweging, het die Beweging vyf belangrike doelwitte met internasionale skakeling. Eerstens is dit om kulturele vriendskappe in soveel as moontlik lande te smee sodat daar veral ʼn groter bewustheid van Suid-Afrika se diversiteit geskep kan word. “Terwyl ons in alle internasionale skakeling Suid-Afrika se enorme uitdagings van swak regering, korrupsie, misdaad en die Afrikaners se unieke belewenis van Suid-Afrika oordra, maak ons dit ook duidelik dat Suid-Afrika ʼn land van ongekende geleenthede is en dat die land nie afgeskryf moet word nie. Ons bevorder dus vriendskap, eerder as om net buitelandse kritiek en druk te probeer ontlont.” Verdere doelwitte sluit in die bevordering van sake-geleenthede, akademiese samewerking, uitruiling van landboukennis en -tegnologie en kulturele projekte om groter bewustheid van die twee streke se kulturele verskeidenheid te skep.

Die Beweging beplan veral om deur die nuutgestigte vereniging sakegeleenthede vir sy lede in Hongarye te help ontgin sodat lede van die Beweging hul internasionale bedrywighede kan diversifiseer. “Ons het tydens ons besoek ook met verskeie universiteite, akademici en politici wat akademiese beleid beïnvloed, vergader met die doel om ons eie opleidingsinstellings, insluitende Akademia en Sol-Tech, se internasionale bande te versterk. Ons verwag baie goeie samewerking oor die volgende paar jaar tussen ons instellings en universiteite in Hongarye. Die Beweging se planne om binnekort met landbou-opleiding te begin, sal ook ʼn hupstoot kry met samewerking uit Hongarye. Verder beplan ons om met die hulp van groepe in Hongarye meer studente uit Suid-Afrika te stuur om met spesiale beurse in Hongarye te gaan studeer.”

Die Beweging se afvaardiging na Hongarye het bestaan uit Kleynhans, dr. Theo de Jager, voorsitter van Saai, Werner Human, operasionele bestuurder van die Beweging, Ernst Roets, hoof van beleid en aksie van AfriForum, en Piet le Roux, uitvoerende hoof van Sakeliga.

 

Solidariteit Beweging betuig meegevoel met Zoeloes na afsterwe van koning Zwelithini

Die Solidariteit Beweging het vandag sy innige simpatie teenoor die Zoeloes se koninklike familie en die Zoeloe-gemeenskap as ʼn geheel betuig nadat dit bekend geword het dat Sy Majesteit Koning Goodwill Zwelithini vanoggend oorlede is.

Volgens Flip Buys, voorsitter van die Solidariteit Beweging, het die Beweging, en AfriForum in die besonder, goeie verhoudings met die koninklike familie gehandhaaf om sodoende wedersydse erkenning en respek tussen verskillende kultuurgemeenskappe in Suid-Afrika te bewerkstellig.

Volgens Buys het koning Zwelithini ʼn beduidende rol in die kulturele uitlewing en identiteit van die Zoeloes gespeel en deurentyd ook respek teenoor ander kultuurgemeenskappe in ʼn diverse land betoon.

“Dit is vir ons as Beweging hartseer om van die afsterwe van koning Zwelithini te verneem. Die land en die Zoeloe-gemeenskap in die besonder is armer weens sy afsterwe,” het Buys gesê.

Ramaphosa moet vanaand regulasies verslap – Solidariteit Beweging

Die Solidariteit Beweging het vandag gesê dat daar geen rede meer bestaan hoekom die huidige vlak van die inperkingsmaatreëls nie vanaand al na vlak 1 verslap behoort te word nie. Dit volg nadat dit vroeër vandag bekend geword het dat pres. Ramaphosa die land vanaand weer gaan toespreek.

Volgens Flip Buys, voorsitter van die Solidariteit Beweging, het die aansteekkoers in die land tot so ‘n mate gedaal dat dit irrassioneel sal wees om die land op dieselfde inperkingsvlak te hou as wat dit op die kruin van die tweede vlaag was. “Die logika agter ‘n inperking is om die aansteekkoers tot so ‘n mate te verlangsaam dat die hospitale genoeg kapasiteit het om die aantal pasiënte wat versorging nodig het, te kan hanteer. Dit is egter tans nie meer ‘n risiko nie omdat die aantal gevalle so te sê gehalveer het, soos wat die tendens tydens die eerste vlaag ook was,” sê Buys.

Volgens Buys bestaan daar geen rede om die ekonomie verder aan bande te lê en sektore soos  toerisme en die drankbedryf, wat reeds bykans op hul knieë is, te vernietig met verlengde vlak 3-regulasies nie.

Voorts betoog Connie Mulder, hoof van die Solidariteit Navorsingsinstituut, dat die regering se aandrang op inperkingsregulasies as enigste maatreël om die verspreiding van die virus te bekamp, baie kortsigtig is en boonop nie veel doen om die verspreiding van die virus te velangsaam nie. Dit slaag wel daarin om die publiek se wantroue in die regering te versnel.

“Die instelling van inperkingsregulasies wat met onmiddellike effek in werking tree sonder om met die publiek en die nodige bedrywe te konsulteer, moedig slegs die publiek aan om hul vertroue in die regering se vermoë om verantwoordelik en rasioneel op te tree, te hersien.”

Buys benadruk dat die tyd nou aangebreek het om die maatreëls dringend te verslap. “Ons boodskap is duidelik – maak die land oop en hou op om die publiek soos kinders te hanteer. Al wat erger is as die publiek wat hierdie krisis self bestuur, is die regering wat aanhou poog om dit te doen,” sê Buys.

“Die Solidariteit Beweging glo dat die ekonomie tesame met gesonde werk en gesonde onderwys gesond oopgemaak kan word,” sluit Buys af.

ANC se ekonomiese beleid bly grootste bedreiging vir pensioengeld

Die Solidariteit Beweging het vandag gesê dat die ANC se skadelike ekonomiese beleid die grootste gevaar vir pensioene is. Dit bly die geval, of die regering sy vasbeslotenheid om voorgeskrewe bates op pensioenfondse af te dwing vir eers op die lange baan geskuif het, of nie.

Die Beweging het dit voorts gestel dat veral batebestuurders steeds besonder waaksaam moet wees en in die beste belang van hul lede moet optree.

Dit volg nadat eers minister Tito Mboweni dit in sy MTBR-rede gestel het dat die regering gaan poog om dit vir pensioenfondse makliker te maak om op ʼn vrywillige basis in staatsprojekte te belê, waarna die hoof van belegging en infrastruktuur in die presidensie, dr. Kgosientso Ramokgopa, ook daarna verwys het om pensioenfondse te oortuig om in staatsprojekte te belê.

Volgens Flip Buys, voorsitter van die Solidariteit Beweging, is dit te verstane dat Suid-Afrikaners bekommerd is oor die toekoms van hul pensioenfondse. “Dit is algemeen bekend dat die regering ʼn fiskale krisis in die gesig staar weens onder meer langdurige wanbestuur en korrupsie.”

“Pensioenfondse word as die spreekwoordelike pot goud gesien wat in plaaslike projekte belê kan word om die ekonomie te help aanwakker. Die regering het egter ʼn uiters swak rekord wanneer dit by die lewering van groot projekte kom. Om te aanvaar dat hierdie tendens oornag gaan verander en dat hierdie projekte nou ʼn wesenlike opbrengs vir pensioenfondslede gaan beteken, is bloot wensdenkery,” het Buys beklemtoon.

Volgens Buys is die ANC se skadelike ekonomiese beleid steeds die grootste meulsteen om die ekonomie se nek. “Indien die regerende party nie van sy skadelike idees, waaronder onteiening sonder vergoeding, uitermatige groot staatsalarisrekeninge en aanhoudende reddingsboeie aan uitgediende staatsentiteite afstand doen nie, sal die ekonomie bly steier,” het Buys gesê.

Solidariteit Beweging maan Cyril aan oor moontlike verskerping van inperking

Die Solidariteit Beweging het ‘n aanmaningsbrief aan President Ramaphosa en die Minister van Samewerkende Regering en Tradisionele Sake, Nkosazana Dlamini-Zuma gestuur, en gemaan dat enige verskerping van die bestaande inperkings ondoeltreffend en verwoestend vir die ekonomie en die landsburgers sal wees.

Dit is te wagte dat Ramaphosa vroeg volgende week die nasie sal toespreek, na oorweging van aanbevelings van ‘n verslag van die Departement van Gesondheid.

“Die regering het in die verlede maatreëls afgedwing wat dubbelsinnig, onprakties en  irrasioneel is. Ons maan Ramaphosa vriendelik aan dat ons enige verdere irrasionele en onredelike maatreëls in die hof sal uitdaag” sê Flip Buys, Voorsitter van die Solidariteit Beweging.

“Daar word deurlopend vrees aangejaag oor ‘n tweede golf en groot gewag gemaak van ‘n geringe styg in gevalle. Die werklikheid is dat positiewe gevalle onder 10% van toetsing bly, waar dit 30% van toetsing was toe Suid-Afrika sy kruin bereik het” sê Buys.

“Positiewe gevalle kan maklik manipuleer word om die skyn van ‘n tweede golf te skep, deur die toetsing op te stoot. Die ware maatstaaf is egter om die verhouding tussen toetsing en positiewe gevalle te meet” sê Buys.

Die Solidariteit Beweging voer sterk aan dat skerp inperkings nie ‘n tasbare verskil maak in positiewe gevalle nie. Maar, daar is beslissende tasbare ekonomiese gevolge in ‘n skerp inperking.

•    In die tweede kwartaal was 2.2 miljoen mense hul werk kwyt, waar ‘n wesenlik gedeelte van die getal die mees kwesbaarstes in Suid-Afrika.
•    ‘n Verwagte tekort van meer as R 300 miljard aan die invordering van belasting.
•    Die BBP het in een kwartaal 16.4% gedaal, waar die daling 51% op ʼn jaargrondslag is.

Die Solidariteit Beweging maan die regering ernstig aan om nie enige verskerping van die maatreëls in te stel nie, en sal die nodige regstappe neem sou enige onsinnige en onredelike maatreëls ingestel word.

Nederlandse politici opper ernstige vrae oor situasie in Suid-Afrika

Drie Nederlandse parlementslede het in ʼn reeks vrae aan die Nederlandse minister van buitelandse sake, Stef Blok, opnuut hul kommer uitgespreek oor aanvalle op plase en die ANC-regering se beplande grondonteiening sonder vergoeding. Dit volg nadat die Nederlandse parlement verlede jaar ʼn mosie teen grondonteiening sonder vergoeding aanvaar het. Volgens dié mosie moes minister Blok Nederland se veroordeling van hierdie beleid aan die Suid-Afrikaanse regering oordra.

Die Solidariteit Beweging is die afgelope twee jaar aktief besig om regerings in Europa te versoek om meer druk op die Suid-Afrikaanse regering uit te oefen. Volgens Jaco Kleynhans, hoof van internasionale skakeling by die Solidariteit Beweging, is die 12 vrae verlede week deur twee parlementslede van die sentristiese Christen-Democratisch Appèl (CDA), Martijn van Helvert en Jaco Geurts, en die leier van die Staatkundig Gereformeerde Partij (SGP), Kees van der Staaij, aan minister Blok gerig. Verlede jaar se mosie is deur die CDA en SGP ingedien en is ook deur premier Mark Rutte se regerende party, die Volkspartij voor Vrijheid en Demokratie (VVD), sowel as die ChristenUnie, 50Plus, Forum voor Demokratie en die Partij voor de Vrijheid (PVV) ondersteun.

In die vrae wat aan minister Blok gerig is, wil die drie parlementslede duidelikheid hê oor die Nederlandse regering se skakeling met pres. Ramaphosa oor plaasmoorde en grondonteiening. Hulle vra die minister ook om dit te oorweeg om plaasaanvalle by die Verenigde Nasies se Menseregteraad aan te meld.

Volgens Kleynhans is daar steun vir ʼn goeie verhouding tussen Suid-Afrika en Nederland onder ʼn meerderheid van Nederlandse politici. “Tydens my ses besoeke aan Nederland die afgelope 18 maande en in gesprekke met politici oor die hele politieke spektrum heen is dit duidelik dat Nederlandse politici en sakelui graag die sterk verhouding tussen die twee lande wil voortsit en selfs verder wil uitbrei, maar dat daar ernstige kommer oor regeringsverval, korrupsie, veiligheid (insluitende plaasaanvalle) en eiendomsreg bestaan. Verskeie Nederlandse maatskappye doen sake in Suid-Afrika en oorweeg verdere uitbreiding hier, maar die beplande grondonteiening sonder vergoeding sal sulke investering in die wiele ry.”

“Ons boodskap aan politici in twaalf lande in Europa met wie ons die afgelope tyd geskakel het, is dat ernstige druk op die Suid-Afrikaanse regering uitgeoefen moet word.” Die Solidariteit Beweging is ook besig om steun by partye in die Europese Parlement te werf in die hoop dat die Europese Unie standpunt sal inneem oor die situasie in Suid-Afrika.

Die Solidariteit Beweging eis dat ramptoestand beëindig word

Daar bestaan nie meer regverdiging vir die voortsetting van ’n ramptoestand nie, en die verskuiwing na vlak 1 van die nasionale inperking is te min te laat. Die Solidariteit Beweging gaan regstappe neem indien die regering op 15 Oktober dit weereens wil verleng.

Flip Buys, voorsitter van die Solidariteit Beweging voer aan: “Die voortgesette inperking het alreeds in ’n baie groter ramp as die Covid-pandemie ontaard, en bedreig die lewensbestaan van miljoene mense. Dwang deur die staat behoort dadelik laat vaar te word ten gunste van persoonlike verantwoordelikheid vir mense se gesondheid.”

Volgens die Beweging het ’n ramptoestand net bestaansreg indien die staat die effek van die ramp beter as sy burgers en ondernemings kan hanteer. “Ons is verby die punt en moet begin om weg te beweeg van staatsbeheer na burgerlike verantwoordelikheid,” het Buys gesê.

Werner Human, adjunkbestuurshoof van Solidariteit verduidelik die volgende: “Daar is hoegenaamd geen gegewens wat die denkrigting ondersteun dat die enigste manier om die dreigement van ʼn virus te bestry, is om ʼn land in sy geheel onder ʼn  kwasi-outokrasie te werp nie.”

Solidariteit stel dat selfs met die piek van die Covid-19-pandemie het die staat misluk om die pandemie effektief te bestuur. Hulle was, volgens Solidariteit, roekeloos met die bestuur van die ekonomie en kaders het die ramptoestand misbruik om te plunder.

“Die ramptoestand ingevolge die Rampbestuurwet is nou onlangs vir die sesde agtereenvolgende maand hernu ten spyte van die drastiese afname in die virus se impak, sowel as die drastiese toename in die skadelike impak van die inperking. Vlak 1 laat steeds te veel onsekerheid en plaas ʼn onbillike las op te veel mense,” het Human gesê.

“Dit is dringend nodig dat die land na ’n gesonde normaal terugkeer, sodat die werk om die land weer op te bou aangepak kan word. Die regering se nuutste plan om die ekonomie op dreef te kry gaan tot niks lei as vertroue in die landsbestuur nie vinnig herstel word nie. Vertroue is die enigste werklike stimulus wat die land uit die huidige doodloopstraat sal kan kry. Daarvoor is beleidsekerheid, fiskale dissipline, ’n skoon regering, bekwame landsadministrasie en regsekerheid noodsaaklik. Sonder om daadwerklik korrupsie, wanbestuur en beleidsrigtings wat tot die land se afgradering al voor die pandemie gelei het, aan te pak, sal ekonomiese planne net op papier bly,” het Buys voorts gesê.

“Werkskepping sal net gebeur as diepliggende hervormings aangebring word, en as sosialistiese planne en rassevoorskrifte laat vaar word ten gunste van bewese beleid wat ekonomiese groei bevorder,” het Buys afgesluit.

Inperking: Te min te laat

Die aankondiging dat die ekonomie verder oopgemaak word is te min te laat. Die regering moes minstens 7 provinsies tot vlak 1 oopgestel het. SA is nou in ‘n ramptoestand as gevolg van die regering se wanbestuur van die ekonomie.

Die Covid-19 kurwe is besig om af te plat, maar die wyse waarop die pandemie deur die regering bestuur is veroorsaak dat die ekonomiese krisiskurwe nou eers begin styg. Die gevolge van die irrasionele sluit van die ekonomie gaan nog jare nadat die pandemie onder beheer is, voortduur.

Die regering het geen begrip getoon vir die delikate werking van die ekonomie nie. Mag is misbruik, politieke agendas is gedryf en fondse is geplunder.

Die Solidariteit Beweging doen ‘n beroep op die staat om verdere inmenging in die ekonomie te staak.

IMF-lening is vir Suid-Afrika; nie ’n skenking vir sekere politici nie – Solidariteit Beweging

Die Solidariteit Beweging het vandag gesê dat die lening van sowat R70 miljard wat die Internasionale Monetêre Fonds (IMF) aan Suid-Afrika toegestaan het, aangewend moet word om die land midde die krisis te help en nie deur sekere politici as ’n skenking vir hul eie sakke of projekte beskou moet word nie.

Dit volg nadat sekere amptenare wat hoog op is onlangs betrek is by ’n ondersoek na korrupsie en tenderbedrog rakende die toekenning en aanwending van koronavirus-noodfondse, en verdere reddingsboeie aan ondermeer die SAL.

Volgens Flip Buys, voorsitter van die Solidariteit Beweging, is lenings wat deur ’n regering aangegaan word uiteindelik ’n juk wat die belastingbetaler moet dra om die skuld te vereffen. Derhalwe dring die Beweging daarop aan dat presiese inligting rakende die aanwending van hierdie fondse bekend gemaak moet word om sodoende deursigtigheid te verseker. “Met ’n verwagte staatskuld van oor die 80% van die bruto binnelandse produk (BBP) vir die jaar, kan ons nie bekostig dat fondse wat ten duurste bekom word om Suid-Afrika tydens die krisis te help deur korrupte kaders gekaap word, terwyl belastingbetalers vir die gelag moet betaal nie,” het Buys gesê.

Buys het voorts gesê dat die Beweging binnekort met die IMF in verbinding sal tree om te verseker dat daar strenger vereistes en maatreëls in plek gesit word vir toekomstige lenings met betrekking tot korrupsie en reddingsboeie aan kronies sukkelende staatsinstellings soos die SAL. “Hierdie vereistes is nie alleenlik daar om die IMF te beskerm nie, maar om Suid-Afrikaanse belastingbetalers en die land as ’n geheel teen verkwisting te beskerm. Ongeag die vereistes, indien daar voorts nie hervormings plaasvind wat pro-besigheid en ekonomiese groei is nie, sal Suid-Afrika in ’n strik van skuld vasgevang word waaruit hy moeilik sal kan herstel,” het Buys gesê.

Volgens Buys het Suid-Afrika nie meer die luuksheid om staatsideologieë soos herverdeling voor te staan wat ekonomiese groei demper nie. “Die fiskale ruimte is reeds uiters beperk en verdere deregulering moet plaasvind om dit vir ondernemings so maklik as moontlik te maak om sake te doen en werk te help skep,” het Buys gesê.

Bevordering van private moedertaalonderrig deur hoofregter bekragtig – Solidariteit Beweging

Die Solidariteit Beweging het vandag bevestig dat hy sy planne gaan versnel om opvoedkundige instellings met Afrikaans as voertaal vinniger uit te bou. Dit volg nadat dat die LUR vir Onderwys in Gauteng, Panyaza Lesufi, in die Nasionale Raad van Provinsies (NRP) kritiek gelewer het op ’n volbank van die appèlhof se uitspraak oor Afrikaans by Unisa. Hy het in dieselfde toespraak ook kritiek op Solidariteit se bestaande privaat instellings gelewer.

Volgens die voorsitter van die Solidariteit Beweging, Flip Buys, het die Konstitusionele Hof by monde van hoofregter, Mogoeng Mogoeng, in 2019 in sy uitspraak in die Stellenbosch-taalsaak ’n beroep op die gemeenskap gedoen om self private onderriginstellings ter bevordering van Afrikaans en ander inheemse tale te bou, ingevolge artikel 29(3) van die Grondwet. Hoofregter Mogoeng het selfs ’n beroep op korporatiewe welwillendheid gedoen om hulpbronne beskikbaar te maak om sodoende te help om privaat opleidingsinstellings vir Afrikaans en ander inheemse tale te befonds.
“Hoofregter Mogoeng se versoek dat gemeenskappe self instellings moet bou en dit met eie kapitaal moet finansier om taal te bevorder, is dus presies wat die Beweging, binne die raamwerk van die Grondwet, doen,” het Buys gesê. Hy het beklemtoon dat hoofregter Mogoeng se uitspraak voortbou op vele soortgelyke standpunte deur die Konstitusionele Hof ten gunste van Afrikaans en Afrikaanse instellings vir hoër onderwys.

“Super-taal”
Volgens Buys is dit ironies dat Lesufi tydens die debat van die NRP gemaan het dat daar nie ’n “super-taal” moet wees nie en dat alle tale gelyk moet wees, terwyl hy doelbewus en met ywer voortgaan om erkende inheemse tale te ondermyn sodat Engels as die enigste “super-taal” van onderrig by instellings voortbestaan. “Die Solidariteit Beweging, anders as die LUR, staan juis die beginsel van veeltaligheid voor en moedig dus ook enige gemeenskap aan om hulle taal deur onderriginstellings te bevorder. Die Beweging is voorts bereid om saam met enige gemeenskap te werk om dít te verwesenlik,” het Buys gesê.
Hy het ook beklemtoon dat die Beweging se opleidingsinstellings ten doel het om wêreldklas in Afrikaans te wees. “Die doel is nie om ander uit te sluit of om Afrikaanse studente te isoleer nie, maar juis om die Afrikaanse ruimtes te skep wat dit vir jongmense moontlik sal maak om saam in Suid-Afrika te bly tot voordeel van die land en al sy mense. Die doel is ook nie om uitsluitend te wees nie, maar juis om te verseker dat Afrikaans as akademiese taal én Afrikaanse studente ingesluit is. Hierdie instellings is ook oop vir enige anderstalige student wat in Afrikaans wil studeer.

Kulturele infrastruktuur
Die internasionale reg en die Grondwet se vertrekpunt is dat taal- en kultuurgemeenskappe die reg op bestaan en voortbestaan het, en dat hulle instellings mag hê om hulle taal en kultuur na die volgende geslag oor te dra. Enige poging om hulle hierdie reg te ontsê, is ’n totalitêre poging om daardie gemeenskappe te vernietig. Daarom is die Solidariteit Beweging se opvoedkundige instellings deel van ons strategie om die kulturele infrastruktuur te bou wat nodig is om dit vir Afrikaners en Afrikaanssprekendes moontlik te maak om vry, veilig en voorspoedig in Suid-Afrika te bly. Die Grondwet se uitgangspunt is juis eenheid in verskeidenheid, en daarom sal pogings om eenvormigheid af te dwing of om minderhede by die meerderheid in te lyf, met alle mag teengestaan word.

“Demokrasie sonder kulturele vryheid, is net vryheid vir die demografiese meerderheid en dus ondemokraties. Daarom mag aktivistiese politici, wat die multikulturele werklikheid van die land met ’n monokulturele ideologie probeer omskep na hulle politieke beeld, nie toegelaat word om ter wille van goedkoop publisiteit ’n heksejag teen Afrikaans en sy sprekers te voer nie. Dis ’n deursigtige poging om die aandag van die groter onderwyskrisisse in die land af te lei, waaraan mnr. Lesufi ’n groot aandeel het,” het Buys gesê.

“Ons bly trots op Afrikaans wat volgens kenners soos Prof Mahmood Mamdani van Uganda die mees suksesvolle dekoloniseringsprojek op die Afrika kontinent was,” het Buys gesê.

Inleiding
Hoofstuk 1
Hoofstuk 2
Hoofstuk 3
Hoofstuk 5
Hoofstuk 7
Hoofstuk 8
Hoofstuk 12
Hoofstuk 15
Hoofstuk 16
Hoofstuk 17
Hoofstuk 19
Hoofstuk 20
Hoofstuk 21
Hoofstuk 22
Hoofstuk 23
Hoofstuk 25
Hoofstuk 27
Hoofstuk 28
Hoofstuk 31
Hoofstuk 32
Hoofstuk 34
Slot

Geskiedenisfonds

ʼn Fonds wat help om die Afrikanergeskiedenis te bevorder.

FAK

Die Federasie van Afrikaanse Kultuurvereniginge (FAK) is reeds in 1929 gestig. Vandag is die FAK steeds dié organisasie wat jou toelaat om kreatief te wees in jou taal en kultuur. Die FAK is ’n toekomsgerigte kultuurorganisasie wat ’n tuiste vir die Afrikaanse taal en kultuur bied en die trotse Afrikanergeskiedenis positief bevorder.

Solidariteit Helpende Hand

Solidariteit Helpende Hand fokus op maatskaplike welstand en dié organisasie se groter visie is om oplossings vir die hantering van Afrikanerarmoede te vind.

Solidariteit Helpende Hand se roeping is om armoede deur middel van gemeenskapsontwikkeling op te los. Solidariteit Helpende Hand glo dat mense ʼn verantwoordelikheid teenoor mekaar en teenoor die gemeenskap het.

Solidariteit Helpende Hand is geskoei op die idees van die Afrikaner-Helpmekaarbeweging van 1949 met ʼn besondere fokus op “help”, “saam” en “ons.”

Forum Sekuriteit

Forum Sekuriteit is in die lewe geroep om toonaangewende, dinamiese en doeltreffende privaat sekuriteitsdienste in

Suid-Afrika te voorsien en op dié wyse veiligheid in gemeenskappe te verhoog.

AfriForumTV

AfriForumTV is ʼn digitale platform wat aanlyn en gratis is en visuele inhoud aan lede en nielede bied. Intekenaars kan verskeie kanale in die gemak van hul eie huis op hul televisiestel, rekenaar of selfoon verken deur van die AfriForumTV-app gebruik te maak. AfriForumTV is nóg ʼn kommunikasiestrategie om die publiek bewus te maak van AfriForum se nuus en gebeure, maar ook om vermaak deur films en fiksie- en realiteitsreekse te bied. Hierdie inhoud gaan verskaf word deur AfriForumTV self, instellings binne die Solidariteit Beweging en eksterne inhoudverskaffers.

AfriForum Uitgewers

AfriForum Uitgewers (voorheen bekend as Kraal Uitgewers) is die trotse uitgewershuis van die Solidariteit Beweging en is die tuiste van Afrikaanse niefiksie-, Afrikanergeskiedenis- én prima Afrikaanse produkte. Dié uitgewer het onlangs sy fokus verskuif en gaan voortaan slegs interne publikasies van die Solidariteit Beweging publiseer.

AfriForum Jeug

AfriForum Jeug is die amptelike jeugafdeling van AfriForum, die burgerregte-inisiatief wat deel van die Solidariteit Beweging vorm. AfriForum Jeug berus op Christelike beginsels en ons doel is om selfstandigheid onder jong Afrikaners te bevorder en die realiteite in Suid-Afrika te beïnvloed deur veldtogte aan te pak en aktief vir jongmense se burgerregte standpunt in te neem.

De Goede Hoop-koshuis

De Goede Hoop is ʼn moderne, privaat Afrikaanse studentekoshuis met hoë standaarde. Dit is in Pretoria geleë.

De Goede Hoop bied ʼn tuiste vir dinamiese studente met Christelike waardes en ʼn passie vir Afrikaans; ʼn tuiste waar jy as jongmens in gesonde studentetradisies kan deel en jou studentwees met selfvertroue in Afrikaans kan uitleef.

Studiefondssentrum

DIE HELPENDE HAND STUDIETRUST (HHST) is ʼn inisiatief van Solidariteit Helpende Hand en is ʼn geregistreerde openbare weldaadsorganisasie wat behoeftige Afrikaanse studente se studie moontlik maak deur middel van rentevrye studielenings.

Die HHST administreer tans meer as 200 onafhanklike studiefondse namens verskeie donateurs en het reeds meer as 6 300 behoeftige studente se studie moontlik gemaak met ʼn totaal van R238 miljoen se studiehulp wat verleen is.

S-leer

Solidariteit se sentrum vir voortgesette leer is ʼn opleidingsinstelling wat voortgesette professionele ontwikkeling vir professionele persone aanbied. S-leer het ten doel om werkendes met die bereiking van hul loopbaandoelwitte by te staan deur die aanbieding van seminare, kortkursusse, gespreksgeleenthede en e-leer waarin relevante temas aangebied en bespreek word.

Solidariteit Jeug

Solidariteit Jeug berei jongmense voor vir die arbeidsmark, staan op vir hul belange en skakel hulle in by die Netwerk van Werk. Solidariteit Jeug is ʼn instrument om jongmense te help met loopbaankeuses en is ʼn tuiskomplek vir jongmense.

Solidariteit Regsfonds

ʼn Fonds om die onregmatige toepassing van regstellende aksie teen te staan.

Solidariteit Boufonds

ʼn Fonds wat spesifiek ten doel het om Solidariteit se opleidingsinstellings te bou.

Solidariteit Finansiële Dienste (SFD)

SFD is ʼn gemagtigde finansiëledienstemaatskappy wat deel is van die Solidariteit Beweging. Die instelling se visie is om die toekomstige finansiële welstand, finansiële sekerheid en volhoubaarheid van Afrikaanse individue en ondernemings te bevorder. SFD doen dit deur middel van mededingende finansiële dienste en produkte, in Afrikaans en met uitnemende diens vir ʼn groter doel aan te bied.

Ons Sentrum

Die Gemeenskapstrukture-afdeling bestaan tans uit twee mediese ondersteuningsprojekte en drie gemeenskapsentrums, naamlik Ons Plek in die Strand, Derdepoort en Volksrust. Die drie gemeenskapsentrums is gestig om veilige kleuter- en/of naskoolversorging in die onderskeie gemeenskappe beskikbaar te stel. Tans akkommodeer die gemeenskapsentrums altesaam 158 kinders in die onderskeie naskoolsentrums, terwyl Ons Plek in die Strand 9 kleuters en Ons Plek in Volksrust 16 kleuters in die kleuterskool het.

Skoleondersteuningsentrum (SOS)

Die Solidariteit Skoleondersteuningsentrum (SOS) se visie is om die toekoms van Christelike, Afrikaanse onderwys te (help) verseker deur gehalte onderrig wat reeds bestaan in stand te (help) hou, én waar nodig nuut te (help) bou.

Die SOS se doel is om elke skool in ons land waar onderrig in Afrikaans aangebied word, by te staan om in die toekoms steeds onderrig van wêreldgehalte te bly bied en wat tred hou met die nuutste navorsing en internasionale beste praktyke.

Sol-Tech

Sol-Tech is ʼn geakkrediteerde, privaat beroepsopleidingskollege wat op Christelike waardes gefundeer is en Afrikaans as onderrigmedium gebruik.

Sol-Tech fokus op beroepsopleiding wat tot die verwerwing van nasionaal erkende, bruikbare kwalifikasies lei. Sol-Tech het dus ten doel om jongmense se toekomsdrome met betrekking tot loopbaanontwikkeling deur doelspesifieke opleiding te verwesenlik.

Akademia

Akademia is ’n Christelike hoëronderwysinstelling wat op ’n oop, onbevange en kritiese wyse ’n leidinggewende rol binne die hedendaagse universiteitswese speel.

Akademia streef daarna om ʼn akademiese tuiste te bied waar sowel die denke as die hart gevorm word met die oog op ʼn betekenisvolle en vrye toekoms.

AfriForum Publishers

AfriForum Uitgewers (previously known as Kraal Uitgewers) is the proud publishing house of the Solidarity Movement and is the home of Afrikaans non-fiction, products related to the Afrikaner’s history, as well as other prime Afrikaans products. The publisher recently shifted its focus and will only publish internal publications of the Solidarity Movement from now on.

Maroela Media

Maroela Media is ʼn Afrikaanse internetkuierplek waar jy alles kan lees oor dit wat in jou wêreld saak maak – of jy nou in Suid-Afrika bly of iewers anders woon en deel van die Afrikaanse Maroela-gemeenskap wil wees. Maroela Media se Christelike karakter vorm die kern van sy redaksionele beleid.

Kanton Beleggingsmaatskappy

Kanton is ʼn beleggingsmaatskappy vir eiendom wat deur die Solidariteit Beweging gestig is. Die eiendomme van die Solidariteit Beweging dien as basis van die portefeulje wat verder deur ontwikkeling uitgebrei sal word.

Kanton is ʼn vennootskap tussen kultuur en kapitaal en fokus daarop om volhoubare eiendomsoplossings aan instellings in die Afrikaanse gemeenskap teen ʼn goeie opbrengs te voorsien sodat hulle hul doelwitte kan bereik.

Wolkskool

Wolkskool is ʼn produk van die Skoleondersteuningsentrum (SOS), ʼn niewinsgewende organisasie met ʼn span onderwyskundiges wat ten doel het om gehalte- Afrikaanse onderrig te help verseker. Wolkskool bied ʼn platform waar leerders 24-uur toegang tot video-lesse, vraestelle, werkkaarte met memorandums en aanlyn assessering kan kry.

Ajani

Ajani is ‘n privaat geregistreerde maatskappy wat dienste aan ambagstudente ten opsigte van plasing by werkgewers bied.

Ajani is a registered private company that offers placement opportunities to artisan students in particular.

Begrond Instituut

Die Begrond Instituut is ʼn Christelike navorsingsinstituut wat die Afrikaanse taal en kultuur gemeenskap bystaan om Bybelse antwoorde op belangrike lewensvrae te kry.

Sakeliga

ʼn Onafhanklike sake-organisasie

Pretoria FM en Klankkoerant

ʼn Gemeenskapsgebaseerde radiostasie en nuusdiens

Saai

ʼn Familieboer-landbounetwerk wat hom daarvoor beywer om na die belange van familieboere om te sien deur hul regte te beskerm en te bevorder.

Ons Winkel

Ons Winkels is Solidariteit Helpende Hand se skenkingswinkels. Daar is bykans 120 winkels landwyd waar lede van die publiek skenkings van tweedehandse goedere – meubels, kombuisware, linne en klere – kan maak. Die winkels ontvang die skenkings en verkoop goeie kwaliteit items teen bekostigbare pryse aan die publiek.

AfriForum

AfriForum is ʼn burgerregte-organisasie wat Afrikaners, Afrikaanssprekende mense en ander minderheidsgroepe in Suid-Afrika mobiliseer en hul regte beskerm.

AfriForum is ʼn nieregeringsorganisasie wat as ʼn niewinsgewende onderneming geregistreer is met die doel om minderhede se regte te beskerm. Terwyl die organisasie volgens die internasionaal erkende beginsel van minderheidsbeskerming funksioneer, fokus AfriForum spesifiek op die regte van Afrikaners as ʼn gemeenskap wat aan die suidpunt van die vasteland woon. Lidmaatskap is nie eksklusief nie en enige persoon wat hom of haar met die inhoud van die organisasies se Burgerregte-manifes vereenselwig, kan by AfriForum aansluit.