anneke, Author at Solidariteit Beweging

VSA woede oor SA buitelandse beleid kan duisende hul werk kos

Posted on Februarie 27, 2025 by anneke

Daar is groeiende woede in die VSA regering oor Suid-Afrika se buitelandse beleid. Dit gaan Suid-Afrika duur te staan kom en tienduisende mense gaan met hulle werk betaal vir die regering se roekelose beleidsrigtings.

Dit is die Solidariteit Beweging, waarvan AfriForum en Solidariteit deel is, se reaksie ná gesprekke gister met senior lede van die buitelandse sakekomitee in die Huis van Verteenwoordigers en die Senaat in die VSA. Dit volg ook na gesprekke vroeër die week met senior lede van die Trump-administrasie in die Withuis.

Flip Buys, voorsitter van die Solidariteit Beweging, sê die ANC-regering het oor die jare heen die wêreld se grootste ekonomie vervreem – iets wat ŉ enorme invloed op Suid-Afrika kan hê.
“Dit blyk egter dat die Suid-Afrikaanse regering nie die erns van die situasie besef nie. Hulle soek sondebokke en glo dat die huidige situasie net ŉ diplomatieke misverstand is. In werklikheid is dit ŉ diplomatieke krisis, maar die ANC hou vol dat hulle nie geboelie sal word nie.

“Die vlakke van frustrasie in Washington is só hoog dat ŉ wetsontwerp oorweeg word om die bilaterale verhouding tussen die VSA en Suid-Afrika te hersien,” sê Buys.

Dié konsepwetsontwerp is reeds in 2024 deur die Huis van Verteenwoordigers goedgekeur, maar nie deur die Senaat opgeneem nie. Lede van die buitelandse sakekomitee oorweeg tans om die wet, gegewe die snelveranderende verhouding tussen Suid-Afrika en die VSA, opnuut aan die Huis van Verteenwoordigers voor te lê.

Aangesien Republikeine nou ook die Senaat beheer sal die wet ŉ beter kans staan om aanvaar te word. Die klimaat vir nuwe wetgewing oor die VSA se verhouding met Suid-Afrika is selfs nou beter gegewe die kritiese houding wat die Withuis en lede van die Trump-administrasie jeens Suid-Afrika ingeneem het.

Hierdie wetsontwerp sit Suid-Afrika se historiese bande met die terreurgroep Hamas, en lande soos China, Iran en Rusland in detail uiteen en argumenteer dat Suid-Afrika sy beleid van neutraliteit prysgegee het.

Verder gaan die wetsontwerp ook in op Suid-Afrika se gebrekkige binnelandse beleid, die regering se onvermoë om die land te bestuur en sy laksheid teen korrupsie.

ŉ Omvattende hersiening van die bilaterale verhouding tussen die VSA en Suid-Afrika word daarin voorgestel.
Indien dié wetsontwerp aanvaar word, sal dit uitsluitlik die regering, en spesifiek die ANC, se skuld wees. Hierdie situasie het oor baie jare opgebou, en die onlangse aanvaarding van die Onteieningswet was bloot die sneller.

Hierdie wetsontwerp kan rampspoedige gevolge inhou vir Suid-Afrika se deelname aan die Wet op Groei en Geleenthede in Afrika (Agoa) – ŉ wet wat tariefverligting aan Afrikalande bied.
Agoa en handel met die VSA skep tans werk vir sowat 500 000 Suid-Afrikaners.

Die Solidariteit Beweging het voorgestel dat, in plaas daarvan om gewone Suid-Afrikaners te straf, daar eerder gefokus word op sanksies teen korrupte individue en druk op ANC-leiers.

“Die Suid-Afrikaanse regering skitter egter in sy afwesigheid in die VSA. Dit blyk dat sy diplomatieke vermoëns ineengestort het.
Die Solidariteit Beweging kan nie en wil nie namens die regering optree nie, maar ons glo dat ons versoek vir verskerpte politieke druk om beleidsverandering te weeg te bring, ten behoewe van alle Suid-Afrikaners is,” sê Buys.

Verder het die Solidariteit Beweging lede van die Senaat en die Huis van Verteenwoordigers versoek om by die Amerikaanse president aan te beveel dat Suid-Afrika ŉ lid van Agoa moet bly.
Daar is egter ook ŉ versoek om die diplomatieke druk op Suid-Afrika te behou om ŉ beleidsverandering te bewerkstellig.

Sien die wetsontwerp hier.

Alles wat jy van die Solidariteit Beweging se besoek aan die VSA moet weet

Posted on Februarie 26, 2025Februarie 26, 2025 by anneke

ŉ Afvaardiging van die Solidariteit Beweging, Solidariteit en AfriForum het Dinsdag 25 Februarie in die Withuis in Washington DC met senior verteenwoordigers van pres. Donald Trump se administrasie vergader ter bevordering van die belange van Afrikaners en Suid-Afrika.

Tydens die besoek is ’n memorandum aan die Trump-administrasie oorhandig en staan bekend as die “Washington Memorandum”.

Oor die volgende paar weke reis die afvaardiging deur die VSA om met belange groepe te vergader en inligting oor Suid-Afrika te deel.

Kyk Flip Buys, voorsitter van die Solidariteit Beweging, se boodskap hier

Wat is die fokus van die besoek aan die VSA?

Suid-Afrika se buitelandse beleid en die behoefte daaraan om deur middel van ŉ ooreenkoms tussen die VSA en Suid-Afrika te herbelyn.
Die verbreking van die 1994-ooreenkoms tussen die ANC en Afrikaners en die behoefte aan ŉ kultuurakkoord om ons grondwetlike reg op kulturele outonomie te herbevestig.
Meer inligting oor Afrikaners in Suid-Afrika.
Die Solidariteit Beweging se rol as ŉ burgerlike organisasie wat baie staatsdienste sonder staatsinkomste verskaf.
Die bevestiging van ŉ stel feite oor wetgewing (onderwys en opleiding, rassewette, die Onteieningswet) en beleid in Suid-Afrika.
Humanitêre hulp aan Suid-Afrika.
Die hernuwing van die Wet op Groei en Geleenthede in Afrika (Agoa) en Suid-Afrika se deelname daaraan.

Watter aanbevelings is aan die Trump-administrasie gemaak?

Dat diskriminasie teen Afrikaners gestaak word deur die anti-Afrikaanse Bela-wet en alle rassewetgewing af te skaf.
Dat daar sterk opgetree kan word teen individue wat haatspraak en geweld aanpor.
Dat plaasmoorde tot ŉ prioriteitsmisdaad verklaar word.
Dat eiendomsreg gerespekteer word.
Dat daar ŉ kultuurakkoord met Afrikaners gesluit kan word wat kulturele ruimte vir Afrikaners in Suid-Afrika sal skep.
Dat die Trump-administrasie seker maak dat gewone Suid-Afrikaners nie vir die ANC se foute gestraf word nie en dat die Agoa-handelsooreenkoms steeds behoue bly.
Dat daar humanitêre bystand gebied word deur middel van bydraes aan ŉ Afrikanerontwikkelingsfonds. Dit sal aangewend word vir die uitbou van veiligheidstrukture, maatskaplike strukture, werkstrukture, opleidingstrukture en infrastruktuur om Afrikaners wat hulle op kwesbare plekke bevind gekonsentreerd te vestig.

Wat is AGOA?

Die African Growth and Opportunity Act (AGOA) is ‘n belangrike handelsooreenkoms wat Suid-Afrikaanse uitvoere na die VSA bevoordeel. In 2024 was die waarde van hierdie uitvoere R156,8 miljard, wat ongeveer 576 000 werksgeleenthede in Suid-Afrika ondersteun het. Daarvan is 250 000 werke direk of indirek aan AGOA gekoppel.

Die ANC se roekelose buitelandse beleid en ekonomiese bestuur plaas Suid-Afrika se deelname aan AGOA in gevaar. Indien die land uit AGOA geskop word, sal dit die landbousektor, nywerhede en veral kwesbare gemeenskappe swaar tref. Ironies genoeg sal die elite, wat deur swart bemagtigingstransaksies bevoordeel word, grotendeels onaangeraak bly.

Die Solidariteit Beweging hoop dat Suid-Afrika in AGOA ingesluit bly, terwyl alternatiewe metodes oorweeg word om druk op die ANC te plaas om beleidsverandering teweeg te bring.

Wat is die Solidariteit Beweging se standpunt oor Suid-Afrika se verhouding met die VSA?

Die verhouding tussen Suid-Afrika en die VSA het oor die afgelope jare al hoe meer gespanne geraak weens die ANC-regering se buitelandse beleid en sy negatiewe houding teenoor Westerse lande. Die Solidariteit Beweging het lank reeds gewaarsku teen hierdie vervreemding, en toe president Trump ŉ uitvoerende bevel onderteken wat ekonomiese druk op Suid-Afrika plaas, het dit ŉ diplomatieke krisis ontketen.

Solidariteit beskou die VSA as ŉ strategiese vennoot en verwelkom die Amerikaanse regering se besorgdheid oor sekere ANC-beleidsrigtings soos rassediskriminasie, die Onteieningswet en die regering se buitelandse beleid. Die Beweging het daarom besluit om ŉ afvaardiging na die VSA te stuur om die belange van Afrikaners en alle Suid-Afrikaners in die gesprek te vestig. Dit is noodsaaklik om alternatiewe oplossings te vind, veral rakende Agoa en handelsooreenkomste wat duisende werkgeleenthede in Suid-Afrika ondersteun.

Die Solidariteit Beweging verskil met die ANC, maar is lief vir ons land. Ons besoek aan die VSA is om ŉ positiewe uitkoms vir ons land te vind.

Solidariteit Beweging-afvaardiging vergader in Withuis met Trump-administrasie

Posted on Februarie 25, 2025Februarie 26, 2025 by anneke

Die afvaardiging vra vir verskerpte druk op ANC-leiers in belang van Afrikaners en Suid-Afrika. Die afvaardiging is dankbaar teenoor die Trump-administrasie nadat Trump die kollig op die menseregteskending van Afrikaners, én die ANC se roekelose beleidsrigtings en swak regering van die land geplaas het.

ŉ Afvaardiging van die Solidariteit Beweging, Solidariteit en AfriForum het vandag in die Withuis in Washington DC met senior verteenwoordigers van pres. Donald Trump se administrasie vergader ter bevordering van die belange van Afrikaners en Suid-Afrika.

Die afvaardiging het tydens dié vergadering sy dank teenoor die Trump-administrasie uitgespreek nadat Trump die kollig op die menseregteskending van Afrikaners, én die ANC se roekelose beleidsrigtings en swak regering van die land geplaas het.

Die Beweging is ook dankbaar vir die VSA se bereidwilligheid om bystand aan Afrikaners te bied. “Ons neem graag die hand van vriendskap wat die VSA-regering na Afrikaners uitsteek,” het Flip Buys, voorsitter van die Beweging, aan die verteenwoordigers van die VSA-regering gesê.

Die Solidariteit Beweging het ook ŉ memorandum, getiteld die Washington Memorandum, tydens die vergadering aan die Trump-administrasie oorhandig. In dié memorandum word aangedui dat die belange van Suid-Afrika se inwoners, insluitend Afrikaners, ten beste bevorder kan word deur verskerpte druk op ANC-leiers, eerder as druk op die land.

Hierdie druk moet onder meer poog om eiendomsreg te beskerm, diskriminasie teen Afrikaners te staak deur omvattende rassewetgewing en die Bela-wet te keer, kulturele ruimte aan Afrikaners te bied deur ŉ kultuurakkoord met Afrikaners te sluit, en toe te sien dat ANC-leiers hulle noue bande met Iran en terreurgroepe, soos Hamas, beëindig.

Verskeie ondersteunende dokumente en navorsingsverslae is saam met die memorandum aan die Trump-administrasie oorhandig.

Die VSA word ook in die memorandum versoek om die humanitêre bystand wat die VSA aan Afrikaners bied, beskikbaar te stel om die kulturele infrastruktuur te help bou wat Afrikaners nodig het om voorspoedig in Suid-Afrika te bly.

Die Solidariteit Beweging se afvaardiging na die Withuis is gelei deur die voorsitter van die Solidariteit Beweging, Flip Buys, en het Kallie Kriel, uitvoerende hoof van AfriForum, dr. Dirk Hermann, bestuurshoof van Solidariteit en Jaco Kleynhans, hoof van internasionale skakeling by die Solidariteit Beweging, ingesluit.

Suid-Afrika se deelname aan die Wet op Groei en Geleenthede in Afrika (Agoa) is ook bespreek. Volgens Buys is Suid-Afrika se voortgesette deelname aan Agoa in belang van al die gewone mense, ondernemings en boere in die land en daarom word die VSA versoek om nie Suid-Afrika te straf deur Suid-Afrika se deelname aan Agoa op te sê nie, maar om eerder druk te plaas op ANC-leiers wat verantwoordelik is vir Suid-Afrika se onverantwoordelike beleidsrigtings.

“Diegene wat Agoa wil red deur probleme in Suid-Afrika as ‘disinformasie’ af te maak, sal ongelukkig nie daarin slaag om Agoa te red nie. Die Solidariteit Beweging is lojaal teenoor die land, en besef dat Agoa slegs gered kan word deur met druk op ANC-leiers toe te sien dat Suid-Afrika voldoen aan die vereistes wat Agoa stel.
“Deelnemende lande moet eiendomsreg en menseregte respekteer en nie direk teen die VSA se belange optree nie,” het Buys gesê.

Volgens Kriel het ANC-leiers in die regering minagtend opgetree teenoor AfriForum en die Solidariteit Beweging se opbouende pogings om die ondertekening van die Bela-wet, wat Afrikaanse skole en gevolglik die kulturele voortbestaan van Afrikaners en Afrikaanssprekendes bedreig, en die Onteieningswet te verhoed.

“Sou die ANC-leiers weier om hierdie wette, diskriminerende rassewette en Suid-Afrika se roekelose buitelandse beleid te hersien, sal hulle net hulself kan blameer indien die VSA teen hulle as individue optree.
“Dit is veral ANC-leiers wat hulle aan menseregteskendings en die skending van eiendomsreg skuldig maak. Diegene in die land wat korrupsie pleeg, oproepe tot geweld teen Afrikaners maak of bande met terreurorganisasies het, kan swaar gestraf word.”

Kriel het namens AfriForum se privaatvervolgingseenheid name van leiersfigure, wat volgens die Zondo-kommissie met bedrog en korrupsie verbind word, aan die Trump-administrasie oorhandig. Die VSA het spesiale wetgewing, soos die Magnitsky-wetgewing, vir korrupte politieke leiers wat reeds gebruik is om byvoorbeeld teen die Zimbabwiese regeringsleiers op te tree.

Hermann het tydens die vergadering in die Withuis ook ŉ verslag namens Solidariteit aan die Trump-administrasie oorhandig waarin die wye omvang van diskriminerende rassewetgewing in Suid-Afrika uitgewys word. Volgens Hermann is Suid-Afrika die mees rasgereguleerde land ter wêreld.

Dit misken nie net Afrikaners en ander minderhede se menseregte nie, maar vererger die land se probleme soos rekordhoë werkloosheidsyfers. Dit skrik beleggers af, benadeel ekonomiese groei en vernietig werksgeleenthede. Suid-Afrika moet beleggersvriendelik gemaak word en daarvoor moet rassewetgewing uitfaseer word.

Daarom vra die Solidariteit Beweging dat die Suid-Afrikaanse regering ter wille van Suid-Afrika en al sy mense hierdie uitgediende rassewetgewing moet uitfaseer. Die regering kan nie meer rassewette regverdig deur na die verlede te verwys nie, omdat die uitkoms ná dekades van rassewette wys dat dit nie werk nie, maar net armoede vererger omdat dit werkskeppers en belastingbetalers landuit dryf.

“Die huidige diplomatieke krisis is deur die ANC veroorsaak. Dit is nie net ŉ klein diplomatieke misverstand nie. Die Solidariteit Beweging is nie in die VSA om te paai nie, maar om antwoorde vir Suid-Afrika te kry deur die waarheid aan die lig te bring.
“Die uitkoms waarvoor ons sal werk is tot voordeel van die land ten spyte van die ANC. Druk vir harde beleidsveranderings sal juis goed vir die land wees,” het Hermann bygevoeg.

Die Washington Memorandum, wat aan die Withuis oorhandig is, asook foto’s van die besoek word hierby aangeheg.

Memorandum

Hier is Solidariteit se rasverslag wat saamgaan VSA toe

Posted on Februarie 24, 2025 by anneke

Bron: Solidariteit

Solidariteit gaan tydens sy besoek aan die VSA vra dat druk op die regering volgehou word tot die regering aandui wanneer raswetgewing uitgefaseer gaan word. Lees meer oor Solidariteit se rasverlsag hieronder.

(Links na regs) Kallie Kriel, Flip Buys, Dirk Hermann en Jaco Kleynhans is deel van die afvaardiging van die Solidariteit Beweging wat die VSA gaan besoek. — (Links na regs) Kallie Kriel, Flip Buys, Dirk Hermann en Jaco Kleynhans is deel van die afvaardiging van die Solidariteit Beweging wat die VSA besoek.

Solidariteit gaan tydens sy komende besoek aan die VSA vra dat druk op die regering volgehou word tot die regering aandui wanneer raswetgewing uitgefaseer gaan word.

Dit is volgens ‘n verslag oor Suid-Afrika se rasbedeling wat aan die Amerikaanse regering oorhandig gaan word. Solidariteit beplan ook om die G20-lande van Suid-Afrika se rasbeleid bewus te maak.

‘n Opvolgverslag oor die koste van rasbeleide vir die ekonomie en die invloed daarop op werkloosheid gaan later vanjaar gepubliseer word.
Solidariteit voer in die verslag aan dat rasgebaseerde beleide volgens internasionale norme en ooreenkomste, insluitend dié van die Internasionale Arbeidsorganisasie (ILO) en die Konvensie oor die Uitwissing van Alle Vorme van Rassediskriminasie (ICERD), van ‘n tydelike aard moet wees.

“Die werklikheid in Suid-Afrika is egter dat hierdie beleide permanent geraak het, sonder enige duidelike einddatum of meetbare doelwitte om ongelykheid regtig aan te spreek,” het Connie Mulder hoof van die Solidariteit Navorsingsinstituut (SNI) gesê.

Die verslag wys hoe Suid-Afrika na 30 jaar een van die mees rasgereguleerde lande ter wêreld geword het met nagenoeg 140 rassewette,
Mulder, sê Suid-Afrika is weens sy G20-voorsitterskap én politieke omwentelinge in die VSA meteens in die kollig en die wêreld is ontnugter oor Suid-Afrika. Hy sê ook dat die VSA en ander G20-lande druk op Suid-Afrika moet plaas om van rasbeleide ontslae te raak om Suid-Afrika meer beleggersvriendelik te maak.

“Hierdie rasbeleide, wat veronderstel was om ongelykhede van die verlede reg te stel, het beslis nie daarin geslaag om werkloosheid of armoede te verminder nie. Pleks daarvan het ŉ nuwe elite van tenderpreneurs en kaderontplooiing die lig gesien,” sê Mulder.

Die verslag wys op verskeie absurde gevolge van Suid-Afrika se rasbeleide. Dit sluit in:

• Eskom: Ingenieurs is vervang op grond van ras, wat bygedra het tot die energiekrisis.
• COVID-19-hulp: Fondse is slegs aan besighede gegee met ‘n meerderheid swart eienaarskap.
• Sportkwotas: Spanne verloor wedstryde weens hul sogenaamde “onverteenwoordigende” samestelling. Daar is selfs rasskeidsregters.
• Waterlisensies: Nuwe lisensies vereis nou 75% swart eienaarskap.
• Internasionale belegging: Starlink kon nie in Suid-Afrika sake doen sonder om 30% van sy aandele aan ‘n swart aandeelhouer af te staan nie.

Klik hier vir die volledige verslag.

Akademia: ŉ Fakkeldraer vir die Afrikaanse universiteitswese

Posted on Februarie 11, 2025Februarie 11, 2025 by anneke

Suksesvolle en veerkragtige taal- en kultuurgemeenskappe word gekenmerk deur gesonde, stabiele en florerende onderwys en beroepsopleiding. Wat die Afrikaanse taal- en kultuurgemeenskappe betref, dra Akademia trots die fakkel van die Afrikaanse universiteitswese. As onafhanklike hoëronderwysinstelling vanuit die Christelike en klassieke universiteitstradisie vier die instelling onomwonde sy roeping as moedertaalstudietuiste en word daar roepingsgedrewe na ŉ vrye toekoms gewerk.

Akademia: ŉ Hoopgewende alternatief vir Afrikaanssprekendes

Prof. Danie Goosen, uitvoerende hoof: Akademie by Akademia, meen die instelling verteenwoordig ŉ hoopgewende alternatief vir Afrikaanssprekendes binne die Suid-Afrikaanse universiteitswese. Hierdie roepingsgedrewe bestaansreg word veral genoodsaak in ŉ tyd waarin Afrikaans as primêre onderrigtaal by openbare universiteite verskraal óf selfs mee weggedoen word. As gemeenskapsinstelling is Akademia daarop gerig om die universitêre ideale van die Afrikaanse taal- en kultuurgemeenskappe te dien en ŉ akademiese tuiste te bied waar denke sowel as die hart gevorm word. Volgens Marthinus Visser, besturende direkteur van die instelling, streef Akademia daarna om méér as net wêreldklas opleiding te bied. Die instelling is ook verbonde tot die klassieke rol van die universiteitswese – om studente tot intellektuele, emosionele en lewensbeskoulike volwassenheid te bring. “Akademia werk onverpoosd in geloof, hoop en liefde om op hierdie manier diensbaar tot ons gemeenskap te wees. Op dié manier vestig ons ŉ vernuwende Afrikaanse universiteitswese,” verduidelik Visser.

Van ŉ nederige begin tot ŉ beduidende rolspeler

Die instelling bied sedert 2012 verskeie studieopsies aan studente en het snel ontwikkel tot ŉ voorkeur- Afrikaanse studietuiste. Behalwe vir vyf dinamiese fakulteite, het studente ook die geleentheid om by wyse van óf die voltydse kampusmodel óf die nauurse afstandsmodel te studeer. Eersgenoemde word by die instellings se kampusse in Centurion, en eersdaags ook in die Paarl, aangebied, terwyl die tweede opsie studente by wyse van ŉ sentrumnetwerk dwarsoor die land óf via ŉ e-leeropsie in staat stel om hul studie te voltooi. Laasgenoemde bied ook aan Afrikaanssprekendes buite die Suid-Afrikaanse landsgrense die geleentheid om in hul moedertaal te studeer. Akademia se internasionale voetspoor sluit lande soos onder meer Australië, Namibië, Nederland, Nieu-Seeland, Rusland, Swede, Thailand, die Verenigde Emirate en die Verenigde State van Amerika in.

Dertien jaar van groei

Die instelling kyk vanjaar terug op dertien jaar van klas aanbied en volgens Visser sal daar doelgerig voortgebou word op die positiewe momentum wat in die voorafgaande jare ontsluit is. Hierdie momentum verleen volgens Visser verdere stukrag aan die instelling se bestaansrede as gemeenskapsinstelling. “Akademia het oor die bestek van sy bestaan reeds verskeie gróót en betekenisvolle tree geneem en daar is nougeset gewerk om doelwitte oor verskeie terreine te verwesenlik. Óf dit nou die uitbouing van ons akademiese programaanbod, die vestiging van nuwe studentelewetradisies, geografiese uitbreidingsgeleenthede óf die groei van personeel- en studentegetalle was, die standaard is hóóg gestel en die grondslag is gelê vir selfs groter impak,” verduidelik Visser. Vanaf die registrasie van Akademia as ŉ onafhanklike hoëronderwysinstelling op 3 Januarie 2012 en met ŉ studentetal van 42 studente oor vyf programme het die instelling gegroei na ongeveer 3 800 studente, vyf fakulteite en 23 programme.

Verdere uitbouing van die Afrikaanse universiteitswese

Visser beklemtoon dat Akademia dankbaar is om dié groei van die afgelope dertien jaar te kan vier, maar dat die instelling opnuut die groter roepingsbesef ervaar wat betref die verantwoordelikheid jeens die toekoms. “Akademia is nou gevestig en die tyd van verdieping, verbreding en uitbou het aangebreek. Met ons waardes as kompas en ons visie as eindpunt, werk ons toegewyd om hierdie belangrike taak te verwesenlik,” sê Visser. Die instelling sal vanaf 2026 ŉ kampusteenwoordigheid in die Paarl, in die Wes-Kaap geniet. Hierdie geografiese uitbreiding sal nie net Akademia se bestaande voetspoor in dié streek uitbrei nie, maar ook sy verbondenheid tot die gemeenskap verder versterk. Akademia se kampusdroom, naamlik om ŉ wêreldklas residensiële kampus in Pretoria te vestig waar 5 000 voltydse voorgraadse studente en nagenoeg 1 500 nagraadse studente tuis sal wees, is tans in sy ontwikkelingsfase. Die doeldatum vir dié projek, in vennootskap met die eiendomsontwikkelingsmaatskappy Kanton, word op Januarie 2028 gestel. Die Toekomsbouer-projek bied aan lede van die Afrikaanse taal- en kultuurgemeenskappe die geleentheid om nie net saam oor die toekoms te droom nie, maar ook aktief saam te bou by wyse van skenkings, beleggings en testamentêre bemakings ten einde hierdie kampusdroom te verwesenlik. Stuur gerus ŉ e-pos na skenking@akademia.ac.za en een van Akademia se fondsbestuurders sal spoedig met jou kontak maak om ŉ besoek te reël en die aard van jou skenking, bydrae of nalatenskap te bespreek.

ŉ Wêreldklas kampus in wording. Dié argiteksvoorstelling bied ŉ oorsig van hoe die nuwe Akademia-kampus daarvan sal uitsien.

Die Toekomsbouer-veldtog is van stapel gestuur om Akademia se droom van ŉ wêreldklas residensiële kampus in Pretoria te help verwesenlik en só die voortbestaan van Afrikaanse universiteitswese te help verseker.

Agt dinge wat jy moet weet voordat jy vir vlugtelingstatus aansoek doen

Posted on Februarie 11, 2025 by anneke

Ná pres. Donald Trump se uitvoerende bevel dat die VSA Afrikaners as vlugtelinge sal verwelkom, het die Suid-Afrikaanse Sakekamer in die VSA (Saccusa) binne een naweek navrae van 20 000 Afrikaners gekry oor dié aanbod.

Die Solidariteit Beweging wil egter ’n beroep doen op diegene wat dit sterk oorweeg om die aanbod te aanvaar, om eers al die feite te oorweeg voor daar oorhaastig besluite geneem word.

Jaco Kleynhans, hoof van openbare skakeling by Solidariteit, sê dat die aanbod van vlugtelingstatus nugter benader moet word. Alana Bailey, hoof van kultuursake by AfriForum, raai Afrikaners ten sterkste af om vlugtelingstatus te probeer verkry, “selfs al voel jy bekommerd oor die toekoms”.

Vlugtelingstatus beteken nie outomatiese burgerskap, verblyfreg en beter geleenthede nie. Hiér is wat jy oor vlugtelingstatus in die VSA moet weet:

Jy kan nog nie vir vlugtelingstatus in die VSA aansoek doen nie

Afrikaners kan nie vir vlugtelingstatus in Amerika aansoek doen voordat die Amerikaanse regering nie regulasies ontwikkel het nie. Kleynhans verduidelik:

“Vlugtelingstatus word internasionaal aan die hand van verskeie handveste gedefinieer, maar lande bepaal grootliks hul eie beleid hieroor. Die uitvoerende bevel wat deur pres. Trump onderteken is, verwys na ’n plan wat nog opgestel moet word waarvolgens vlugtelingstatus gereguleer sal word. Niemand kan vir vlugtelingstatus aansoek doen voordat hierdie plan nie bekend gemaak en goedgekeur is nie.”

Die proses om vir vlugtelingstatus aansoek te doen, kan dus nog lank neem en sal stelselmatig plaasvind. Dit is voortydig en naïef om te glo dat duisende Afrikaners net uit Suid-Afrika kan stroom en as vlugtelinge in Amerika kan aanmeld.

As jy vlugtelingstatus het, kan jy nooit weer terugkeer na Suid-Afrika nie – nie eens vir ’n begrafnis nie

Indien jy as vlugteling uit vrye wil na jou tuisland terugkeer, verloor jy onmiddellik jou vlugtelingstatus en jou reg om langer in Amerika te woon. Dit beteken jy sal nie vinnig “huis toe” kan vlieg vir ’n begrafnis, troue of krisis met geliefdes tuis nie.

Om jou tuisland en geliefdes wat hier agterbly permanent te groet, is ’n gewigtige en emosionele besluit wat nie oorhaastig geneem moet word nie.

As vlugteling is jy onderhewig aan streng regulasies

Kleynhans waarsku dat vlugtelingstatus nie verwar moet word met verblyfreg of selfs burgerskap nie. Vlugtelinge word onder baie streng regulasies beheer en jy as individu het baie min seggenskap. Vlugtelinge se voorregte is ook baie beperk teenoor dié van ander immigrante.

Dit is belangrik om te onthou dat alle vlugtelinge immigrante is, maar nie alle immigrante is vlugtelinge nie. Owerhede sal byvoorbeeld alle reëlings rakende behuising, werk, basiese behoeftes, beweegruimte, huwelike en kinders onder streng toesig beheer.

Jy kan nie werk en bly waar jy wil nie

Om aan te sluit by die vorige punt, jy as vlugteling het nie vrye teuels om jou eie keuses oor jou leefwyse in die VSA te maak nie. Jy word in behuising spesifiek vir vlugtelinge geplaas waar jy geen beheer oor die verblyfomstandighede het nie. Verder kan jy nie enige beroep van jou keuse volg nie – die vlugtelingplan bepaal watter werk jy moet doen.

Afrikaners moet beslis nie verwag om ’n middelklassalaris te verdien nie. Die hoë lewenskoste in Amerika moet in gedagte gehou word en jou kwalifikasies en ondervinding sal nie noodwendig in ag geneem word wanneer daar oor jou beroep besluit word nie. Vlugtelinge verrig dikwels lae-inkomste werk teen die minimum loon.

Jy kan enige tyd beveel word om terug te keer na Suid-Afrika

Wanneer die VSA-regering hul beleid verander of besluit dat die situasie in Suid-Afrika verbeter het, kan die vlugtelinge enige tyd terug na Suid-Afrika gedeporteer word.

Jou verblyf in die VSA is dus nie gewaarborg nie, wat dit moeilik maak om met stabiliteit en sekerheid te leef. Dit is nie onmoontlik vir Afrikaners om as vlugtelinge te “begin en hulself op te werk” tot Amerikaanse burgers nie, maar die moontlikheid hang af van baie veranderlikes wat nog onseker is.

Jy mag slegs met beperkte besittings aanmeld

Vlugtelingstatus beteken nie dieselfde as emigrasie nie. Jou meubels en aardse besittings sal ongelukkig nie saam met jou kan reis nie. Jy kan in Amerika aanmeld met slegs die nodigste.

Dit sal vir die middelklaspersoon in Suid-Afrika ’n geweldige ekonomiese verlies wees.

Kleynhans vestig die aandag daarop dat vlugtelingstatus vir mense bedoel is wat werklik swaarkry, alles verloor het, deur erge trauma (soos geweldsmisdade) gegaan het en nog talle ander gevalle. Vir hierdie mense is dit ’n werkbare opsie, en in hierdie gevalle moet die individu se keuse gerespekteer word.

Jy sal nie oor grense heen kan reis nie

Vlugtelinge mag nie sonder toestemming oor die grense van die gasheerland reis nie. Weens die streng regulasies is jou beweging ook beperk.

Bailey waarsku ook: “As ’n mens boonop een keer ’n vlugteling was of om vlugtelingstatus probeer aansoek doen het, sal jy internasionaal ook moeiliker ’n visum kry omdat jy as ŉ risikogeval beskou word wat moontlik ’n onwettige immigrant kan word.”

Dit is onwaar dat die Solidariteit Beweging “nee dankie” gesê het vir pres. Trump se aanbod

Emigrasie en om vir vlugtelingstatus aansoek te doen, is ’n persoonlike besluit en behoort met empatie en ondersteuning benader te word.

Die Solidariteit Beweging se mening is dat dit nie vir almal ’n opsie is om te vlug nie en dat die bogenoemde aspekte deeglik oorweeg moet word.

“Die belangrikste is om te besef dat die Trump-administrasie die eerste Amerikaanse regering is wat direk op die hoogste vlak weer na Afrikaners verwys en dus Afrikaners as ’n wesenlike rolspeler, nie net in Suid-Afrika nie, maar ook in geopolitiek beskou. Dit opsigself is ’n reusedeurbraak. Afrikaners staan nou sentraal in die globale magstryd. Dit hou baie geleenthede in, maar selfs groter risiko’s,” sê Kleynhans.

Die Solidariteit Beweging verwelkom pres. Trump se erkenning van die Afrikaner. Dié wat egter in die land moet of wil agterbly, benodig erkenning en steun om vir onsself ’n toekoms in die land te bou waarin ons vry, veilig en voorspoedig kan leef.

Om te vlug is nie noodwendig die antwoord op die uitdagings wat ons in Suid-Afrika beleef nie. In baie opsigte is dit meer voordelig vir Afrikaners om in die land te bly en te help bou aan ’n beter toekoms. Indien jy regtig graag wil emigreer, moenie vlugtelingstatus as ’n “maklike uitweg” sien nie. Volg eerder die regte kanale vir emigrasie en maak seker van die vereistes en voorwaardes van verblyf in jou nuwe land. Om met Kleynhans se woorde af te sluit:

“Afrikaners se toekoms is in Suid-Afrika, maar altyd met ’n wete dat daar voortdurend geleenthede vir ons mense sal oopgaan om oorsee te gaan woon en werk – soms tydelik, soms permanent. Dit moet ons met groot sensitiwiteit en respek bejeën.”

Solidariteit Beweging verwelkom diplomatieke druk, maar oplossing moet intern gevind word

Posted on Februarie 10, 2025 by anneke

Die voorsitter van die Solidariteit Beweging, Flip Buys, gaan op dringende basis ‘n gesprek met president Ramaphosa aanvra en na die VSA reis vir gesprekke met verteenwoordigers van die Withuis.
Dit volg op president Donald Trump se uitvoerende bevel rakende Suid-Afrika se buitelandse beleid, onteiening, rasgebaseerde beleid en die repatriasie van Afrikaners. Ons was nie bewus daarvan dat mnr. Trump hierdie bevel sou uitreik nie.

Die ANC het oor jare ‘n roekelose binnelandse en buitelandse beleid gevolg, wat daartoe gelei het dat hulle die wêreld se grootste ekonomie en een van Suid-Afrika se belangrikste handelsvennote vervreem het.
Die G20-beraad het internasionale aandag op Suid-Afrika gevestig, en dit sal deur die res van die jaar voortduur. Indien die ANC as voorsitter van die G20-beraad ‘n globale rolspeler wil wees, moet sy internasionale en binnelandse beleid hiermee strook. Dit beteken onder meer dat die ANC nie die grondwetlike skikking mag verbreek deur Afrikaanse skole en moedertaalonderrig deur wetgewing te probeer afskaal nie.

Die Solidariteit Beweging, insluitend Solidariteit en AfriForum, verteenwoordig sowat 600 000 Afrikaner-gesinne en 2 miljoen individue. Ons boodskap aan presidente Ramaphosa en Trump is dat ons probleme in Suid-Afrika self wil oplos. Ons is bereid om eerlike gesprekke met beide partye te voer oor die stand van die land en ons gemeenskap en onderneem om feite korrek en verantwoordelik oor te dra, soos ons nog altyd gedoen het.

Die VSA moet Suid-Afrikaners die geleentheid gee om ons eie uitdagings te hanteer. Die Solidariteit Beweging bly verbind tot gesprek en beskikbaar vir samewerking. Ons verwelkom die politieke druk wat die VSA op die ANC plaas, maar sal standpunt inneem teen die onttrekking van hulp. Ons ondersteun Suid-Afrika se voortgesette deelname aan AGOA, wat duisende boere en werknemers se lewensbestaan verseker.

Gewone Suid-Afrikaners moet nie die prys betaal vir diplomatieke geskille en die ANC se roekelose beleid nie. Die onttrekking van hulp kan ernstige maatskaplike gevolge en verhoogde werkloosheid tot gevolg hê. Enige hulp moet egter deeglik geëvalueer word.
Die oplossing is dat internasionale hulp aan Suid-Afrika moet voortgaan, terwyl Afrikaners praktiese ondersteuning ontvang in hul strewe na kulturele outonomie.

Afrikaners is verbind tot Suid-Afrika en die vasteland. Ons verskil met die ANC, maar is lief vir ons land. Soos in enige gemeenskap is daar individue wat wil emigreer, maar repatriasie van Afrikaners as vlugtelinge is nie vir ons ‘n oplossing nie. Ons wil ‘n toekoms in Suid-Afrika bou en het minimum bestaansvoorwaardes wat ons sal stel en voor sal werk.
Indien die internasionale gemeenskap ons help om ‘n omgewing te skep waarin Afrikaners volhoubaar in Suid-Afrika kan bly, kan ons ‘n blywende bydrae tot die welstand van die land en al sy mense lewer.

Ons lojaliteit aan die land is net so onwrikbaar as ons regmatige strewe na kulturele vryheid en die afskaffing van rassediskriminasie teen ons. Hierdie verbintenis tot ons land en kulturele vryheid is vervat in die Afrikaner-verklaring, wat verlede jaar saam met gemeenskapsleiers onderteken en bekendgestel is.

Die Solidariteit Beweging, spesifiek Solidariteit en AfriForum, sal onmiddellik begin om voorstelle te ontwikkel vir die oplossing van dispute oor onteiening en rasgebaseerde beleid. Verdere inligting sal binnekort bekend gemaak word.

Die Solidariteit Beweging, AfriForum en Solidariteit het Saterdag 8 Februarie 13:00 by AfriForum se hoofkantoor, ’n mediakonferensie oor die Amerikaanse president, Donald Trump, se uitvoerende bevel rakende die posisie van Afrikaners in Suid-Afrika, asook oor befondsing aan Suid-Afrika gehou.

Flip Buys, chairperson of the Solidarity Movement — Flip Buys, voorsitter van die Solidariteit Beweging

Solidariteit Beweging gaan met Trump-administrasie praat

Posted on Februarie 3, 2025 by anneke

Die Solidariteit Beweging het aangekondig dat hy met die VSA regering in gesprek gaan tree oor pres. Donald Trump se uitsprake Sondagaand in die media oor Suid-Afrika. Die Beweging gaan terselfdertyd die Suid-Afrikaanse regering skakel en voortgaan met plaaslike druk om beleidsrigtings wat skadelik vir die land is, te takel.

Trump het Sondagaand aangekondig dat alle befondsing aan projekte in Suid-Afrika onmiddellik gestaak word. Verlede jaar het die Amerikaanse regering meer as 400 miljoen dollar se projekte in Suid-Afrika, veral in die bekamping van MIV/vigs gefinansier. Suid-Afrikaanse universiteite het ook finansiering van die Amerikaanse regering ontvang. Trump is duidelik bewus van pres. Ramaphosa se ondertekening van die Onteieningswet en dit, gekombineerd met die Suid-Afrikaanse regering se voortgesette internasionale regstryd teen Israel, was waarskynlik die katalisators wat tot Trump se ingrepe gelei het.
Trump word ook tans deur adviseurs in die Withuis aangemoedig om standpunt oor minderheidsregte in Suid-Afrika in te neem. Dit volg onder meer op verslae oor die omvang van rassediskriminasie teen minderhede in Suid-Afrika, die omvang van plaasaanvalle en -moorde die afgelope drie dekades en die ondertekening van die Bela-wet. Trump is die afgelope paar dae deeglik hieroor deur sy Afrika-adviseurs ingelig.

Die Solidariteit Beweging is een van die grootste burgerlike bewegings in Suid-Afrika en verteenwoordig sowat twee miljoen Suid-Afrikaners en ŉ netwerk burgerlike instellings, waaronder Solidariteit en AfriForum. Die Beweging is reeds die afgelope paar jaar met verskeie Amerikaanse politici in verbinding om te verseker dat Suid-Afrika se verhouding met die VSA nie skipbreuk lei nie.
“Die Solidariteit Beweging gaan die Trump-administrasie vra om druk op die ANC se beleidsrigtings te plaas, maar om nie gewone Suid-Afrikaners te straf deur maatreëls wat groter werkloosheid veroorsaak of die weerloses benadeel nie. “Ons hou nie van die ANC nie, maar ons is lief vir die land. Om hulp aan Suid-Afrika te sny sal die verkeerde mense raak,” het Flip Buys, voorsitter van die Solidariteit Beweging, gesê.

Terselfdertyd is groter buitelandse druk op die ANC noodsaaklik omdat die grondwetlike skikking tans oor ŉ wye front verbreek word en die ANC voortgaan om alleen te regeer terwyl ŉ regering van nasionale eenheid (RNE) eintlik aan bewind is. Die VSA het ŉ groot verantwoordelikheid om toe te sien dat grondwetlike beloftes soos eiendomsreg, moedertaalskole en -universiteite, en die afskaffing van rassediskriminasie nagekom word, omdat dié beloftes instrumenteel was in die grondwetlike skikking van die 1990’s.

Die Solidariteit Beweging beplan ŉ reeks diplomatieke optredes wat insluit gesprekke met plaaslike diplomate en besoeke aan die Withuis. Die Solidariteit Beweging sal binnekort meer inligting bekend maak.
“Ons gaan gesprek voer oor kwessies soos onteiening, onderwys, gesondheidsorg, rassewette en Agoa. Die uitkoms waarna ons op soek is, is druk vir verandering van beleid, maar nie finansiële tipe sanksies teen die land nie. Om Suid-Afrika uit byvoorbeeld Agoa te skop sal tot die verlies van duisende werksgelenthede lei. Die gevolg sal groter armoede wees en die teelaarde vir meer radikale beleid,” het Buys gesê.

Intussen gaan die Solidariteit Beweging voort met die uitoefening van plaaslike druk. Volgens Buys gaan instellings soos Solidariteit en AfriForum voort met regsaksie oor die nuwe Onteieningswet, die Nasionale Gesondheidsorgversekering, Bela en die land se rassebedeling. “Ons beplan ook gesprekvoering met die ANC oor sy roekelose plaaslike en internasionale beleid wat vernietigende gevolge vir gewone Suid-Afrikaners kan hê,” het Buys gesê.

Dít is waarom die Solidariteit Beweging ons eie onderriginstellings bou

Posted on Februarie 3, 2025 by anneke

Flip Buys, voorsitter van die Solidariteit Beweging, sê: “Ons brand nie en breek nie; ons bou en beskerm. Ons wag nie dat die regering ons probleme oplos nie; ons sal dit self doen, en ons sal dit ook saam doen as dit kan.”

Kritiek wat die Solidariteit Beweging dikwels oor ons onderriginstellings (Sol-Tech, Akadmia, Bo-Karoo Opleiding en Gimnasium) kry, is dat ons ander ras- en kultuurgroepe wil uitsluit en poog om onsself van die res van Suid-Afrika te isoleer.

Dit sal egter meer akkuraat wees om te argumenteer dat openbare universiteite nie ruimte gun vir Afrikaanse kultuur nie. Afrikaans is in die meeste tersiêre staatsinstellings byna uitfaseer. Christelike waardes is nie noodwendig meer die norm nie. Ons universiteite het ’n politieke speelveld geword, eerder as ’n plek waar jongmense hul denke en menswees in ’n veilige omgewing kan vorm.

Die ware redes waarom die Solidariteit Beweging ons eie onderriginstellings bou, is die bevordering van moedertaalonderrig, om ’n plek te skep waar ons Christelike waardes kan beoefen en uitleef, om ruimte te skep waar studente kan deel wees van ’n gemeenskap met ooreenstemmende waardes, om gehalte-onderrig te bied wat behoeftes in die arbeidsmark takel, en om studente voor te berei om uitnemend in hul beroepe te wees.

Die Solidariteit Beweging bou hul eie onderriginstellings, soos die Sol-Tech kampus.

Die bevordering van moedertaalonderrig

Navorsing bewys dat studente wat in hul moedertaal onderrig word, akademies beter presteer as studente wat in hul tweede of derde taal leer. Jaar na jaar bewys Afrikaans-medium skole se matriekuitslae dat moedertaalonderrig die resep vir sukses is.

By die onderriginstellings van die Solidariteit Beweging word daar slegs in Afrikaans onderrig. Dié instellings is van die enigste tersiêre instellings in die land wat onderrig slegs in Afrikaans aanbied. Met Afrikaans wat toenemend as onderrigtaal bedreig word, skep ons instellings hoop. Sonder om vervolging te vrees, kuier, leer, sing en bid studente in Afrikaans – hul moedertaal.

Om ’n plek te skep waar ons Christenskap kan beoefen

Om in die openbaar met skriflesing en gebed te open, is ’n voorreg wat nooit as vanselfsprekend aanvaar mag word nie. Buys verwoord die Solidariteit Beweging se uitgangspunt oor geloof: “Ons voel sterk oor Christenskap, ook omdat dit een van die min samebindende waardes in ons verdeelde land is, waar die Suid-Afrikaanse nasie grootliks net ’n geografiese uitdrukking is.”

By die Solidariteit Beweging se onderriginstellings word Christelike waardes gekoester en openlik onder die studente en personeel bevorder. Christenskap is die enigste geloof wat hier beoefen word en die studente voel veilig om hul geloof uit te leef en te groei in ’n omgewing waar hulle ondersteun word.

Om ’n ruimte te skep waar studente deel kan wees van ’n gemeenskap met ooreenstemmende waardes

Akademia, Sol-Tech en Bo-Karoo Opleiding bied verskeie studente-aktiwiteite aan waar studente hul leierskapvaardighede kan slyp en vriende kan maak wat dieselfde as hulle dink en glo.

Hiér is waar jongmense in ’n veilige omgewing geslyp en gevorm word om selfstandige en standvastige volwassenes te wees.

Die bied van gehalte-onderrig wat behoeftes in die arbeidsmark takel

Sol-Tech is begin omdat gesien is dat daar ’n tekort aan opgeleide ambagslui in die land was. Suid-Afrika het nie oor genoeg gehalte-opleidingskolleges beskik nie en al hoe minder jong persone het hulself in dié loopbaanrigting gekwalifiseer.

Vandag is Sol-Tech tjokvol studente en die leemte in die arbeidsmark word gevul. Studente word nog voor die einde van hul studie by werkgewers geplaas, en baie studente word bemagtig om hul eie ondernemings te begin.

In 2025 open Sol-Tech ook sy eie toetssentrum waar ambagslui akkreditasie kan ontvang. Deur die gapings in die arbeidsmark aan te pak, dra die Solidariteit Beweging by tot die bevordering en groei van die ekonomie. Verder word daar nuwe werksgeleenthede vir jongmense geskep.

Studente word voorberei om uitnemend in hul beroepe te wees

In Suid-Afrika verseker ’n tersiêre kwalifikasie alleen nie meer ŉ pos vir ’n jong gegradueerde nie. Die werksloosheidsyfer is 32,1% en byna die helfte van dié werkloses is jongmense. Verder het jong werkendes nie altyd die ervaring of kennis om in hul werksomgewing suksesvol te wees nie.

By die Solidariteit Beweging se onderriginstellings word studente bemagtig om vanaf die eerste dag by ’n nuwe werk uitnemend te wees. Die Solidariteit Beweging lei nie net studente op in ’n vakgebied nie, maar in waardes en werksetiek wat hul kop en skouers bo ander kandidate laat uitstaan.

Die Solidariteit Beweging hoop nie op ’n goeie toekoms nie; ons bou vir onsself ’n toekoms waarin ons gemeenskappe en kinders vry, veilig en voorspoedig kan leef en leer. Ons onderriginstellings is nie op politieke motiewe gebou nie, maar eerder om hoop en geleenthede te skep.

Twaalf wenke vir studente

Posted on Januarie 30, 2025 by anneke

Flip Buys

Hierdie artikel is gepubliseer op Maroela Media.

Duisende eerstejaarstudente pak eersdaags hulle studie aan. Hoewel Langenhoven gesê het jy moet jou studie met lekkerkry klaarkry, wys die praktyk dat baie jongmense eerder swaarkry as lekkerkry.

Geniet jou studentetyd

is ŉ groot voorreg om te kan studeer. Gryp die geleentheid aan en geniet dit, want jy is net een keer ŉ student! Studente het die voordele van volwassenheid sonder al die verantwoordelikhede. Studentwees is soos om met jou pa se kar rond te ry: Die vryheid en mobiliteit het jy, maar die paaiemente gaan nog van iemand anders se rekening af!

Gebruik jou kans

Gebruik jou kans om te studeer, want ŉ goeie kwalifikasie is ŉ onontbeerlike voorvereiste vir ŉ goeie werk of eie besigheid. Geniet jou studentelewe, maar sorg dat jy jou kwalifikasie suksesvol en in die minimum tyd afhandel. Jy sal die res van jou lewe dankbaar daarvoor wees. ŉ Goeie kwalifikasie kom nie verniet nie; dit kos harde werk en baie geld, maar bied ŉ onvergelykbare opbrengs op die belegging.

Besef wat die doel van studie is

Die doel van studie is nie net om jou vir jou beroep voor te berei nie, maar om jou vir jou roeping toe te rus. ŉ Kwalifikasie help met ŉ werk, maar wie vir sy of haar roeping voorberei, is verseker van ŉ loopbaan, en selfs ŉ snelweg! Werk dus aan jou kwalifikasie, maar ook aan jou eie vorming, ontwikkeling en menswees.Vryheid en verantwoordelikheid

Vryheid en verantwoordelikheid

ŉ Student het ongekende vryheid, want jy is nie meer onder die skool of jou ouers se toesig nie, en is nog nie onderworpe aan die dissipline van die werkplek nie. Hierdie vryheid laat studente soms struikel, want nie almal besef dat dit met verantwoordelikheid gepaard gaan nie. Sorg dus dat jy jou tyd so struktureer dat die vryheid jou nie pootjie nie. Gebruik jou vryheid om doelgerig te werk, en geniet jouself ten volle, maar kom jou belangrikste verantwoordelikheid na, naamlik om jouself te kwalifiseer. Tydbestuur is ŉ groot uitdaging, maar niemand wat sukkel om sy dag te bemeester kan ooit sy graad ten volle bemeester nie.

Bly by

Op skool was die onderwysers deurlopend daar om jou te help om by te bly, en hulle het mede-verantwoordelikheid vir jou sukses geneem. Universiteite en kolleges werk anders. Studente wat nie by die vinnige tempo bybly nie, is seker die grootste rede vir die mislukking van studente wat nie deurkom nie. Sorg dus dat jy nie agter raak nie, anders raak die werk net te veel om in te haal.Byt vas

Byt vas

Dis nie maklik om ŉ kwalifikasie te verwerf nie, anders het almal een gehad. Moenie opgee nie – byt vas en volhard wanneer dit moeilik gaan. Dit bou karakter en vorm jou om eendag uitdagende take in die werkplek aan te pak. As dinge druk, bly kalm en glo in jouself, want soos Henry Ford dit gestel het: Ongeag of jy dink jy kan, of dink jy kan nié, jy sal in albei gevalle reg wees.

Neem deel aan die studentelewe

Die doel van universiteite en kolleges is nie net opleiding nie, maar ook die ontwikkeling en vorming van die student vir sy of haar lewe. Daar word gesê dat deelname aan die studentelewe net soveel werd is as ŉ ekstra graad. Dit bied ŉ veilige omgewing waarin studente veel meer lewensvaardighede kan leer as net wat in die handboek staan.

Daarom is die vormingsideaal so belangrik. ŉ Universiteit of kollege is immers nie net ŉ akademiese supermark nie; dit gaan oor die volle ontwikkeling van jou menswees. Neem dus deel aan die studentelewe, ook as jy nie in ŉ koshuis is nie, en waar moontlik selfs as jy ŉ afstandstudent is. Dit bou ook lewenslange netwerke waaruit jy dekades lank kan put. Die vroeë blootstelling aan leierskap, verantwoordelikheid en gesonde druk in ŉ veilige omgewing sal jou ook in jou werksonderhoude onderskei en jou CV laat uitstaan. Benut elke geleentheid vir ontwikkeling.

Benut elke geleentheid vir ontwikkeling

Studentetyd bied baie geleenthede vir ontwikkeling, maar jy sal dit moet gaan soek en benut, want dit land nie in jou skoot nie. Loop die ekstra myl vir die plek waar jy studeer, vir jou medestudente en vir jou studie. Jy sal verseker die vrugte daarvan pluk, omdat enige werkgewer voorkeur sal gee aan ŉ aansoeker wat meer gedoen het as wat hulle moes.

Beroep en roeping

Leer die verskil tussen ŉ beroep en ŉ roeping. ŉ Beroep is wat jy doen, en ŉ roeping is hoekom jy dit doen. Dis verskriklik om vir dekades lank te werk aan ŉ beroep waar jy voel dat jy jou lewensdoel mis. Soek dus na jou roeping, bid daaroor, en vra raad by mense met wysheid. Ware lewensgeluk spruit uit iemand wat hulle passie lewenslank uitleef, en boonop daarvoor betaal word.

Vra en gebruik hulp

Hulp is dikwels net ŉ e-pos, oproep of besoek vêr. Enige mens het soms hulp nodig. Die universiteit of kollege wil graag hê jy moet suksesvol wees en bied verskeie hulpdienste aan studente. Hierdie dienste strek gewoonlik vanaf bystand met studiemetodes, finansies, persoonlike uitdagings en geestelike behoeftes. Vind uit waar daardie hulp beskikbaar is en gebruik dit as jy dit nodig het.</p><p>Die grootste fout wat jy kan maak, is om nie vir hulp te vra as jy dit nodig het nie. Die tweede grootste fout sou wees om te laat vir hulp te vra. Opleiding is gebou op die skouers en sweet van hulle wat voor ons gekom het. Hulle wou die volgende geslagte help, en het instellings gebou met die uitgesproke doel om jou te help om jou talente te ontgin en jou drome te verwesenlik.

Werk aan jou welstand

Mense is veelkantig. Daarom gaan menslike welstand oor welstand in die wydste sin: fisiek, akademies, geestelik, emosioneel, finansieel en sosiaal. Handhaaf ŉ balans tussen al hierdie fasette, en werk gedurig aan almal.

Kulturele burgerskap

ŉ Samelewing kan net voortbestaan as elke geslag vir die volgende een leef. Diegene wat voor jou was, het die universiteit of kollege opgerig waar jy nou die versamelde kennis en wysheid van baie geslagte kan leer. Bemeester dit, bewaar dit, voeg jou deel daarby, en gee dit dan aan vir die volgende geslag sodat hulle ook daaruit kan put.

ŉ Universiteit of kollege is nie net ŉ plek waar jy moet leer nie; dit is ook ŉ ruimte waar ons kultuur van geslag tot geslag oorgedra word. Jy is nie net ŉ landsburger nie, maar ook ŉ “kultuurburger”, oftewel lid van ŉ kultuurgemeenskap soos Afrikaners wat uit ŉ ketting van geslagte bestaan. Dis dié wat reeds weggeval het, dié wat nou leef, en dié wat nog kom. Dis hoekom die gemeenskap hierdie universiteit of kollege vir jou opgebou het.

Al kry jy dit verniet, was dit beslis nie gratis nie. Bou voort op wat ander vir jou opgebou het.