Media Verklarings Archives - Page 2 of 7

Wat jy van die Amerikaanse verkiesing moet weet – ŉ onderhoud met Jaco Kleynhans

Posted on Oktober 31, 2024 by anneke

Ná twee sluipmoordpogings, Covid-19, ŉ skielike verandering van presidensiële kandidaat, vele nuuswaardige debatte, twee reuse-orkane en ŉ besoek aan McDonald’s, is ons uiteindelik op die vooraand van die Amerikaanse verkiesing.

Dié tuimeltrein van gebeure die afgelope paar maande in Amerika laat Gold Reef City se Tower of Terror soos kinderspeletjies lyk.

Dit is nie aldag ŉ maklike taak om betroubare en georganiseerde inligting te bekom nie, veral te midde van talle menings, beeldmateriaal-flitse, verwronge waarhede en teorieë wat op sosiale media en in die media versprei word.

Dit is dan wanneer Suid-Afrikaners met dankbaarheid staatmaak op kenners soos Jaco Kleynhans wat sy diepgaande kennis op ŉ georganiseerde, verstaanbare wyse in Afrikaans met die publiek deel.

Jaco is die hoof van internasionale skakeling by die Solidariteit Beweging en beskik oor jare se kennis en ondervinding van internasionale politiek. Hy was self eens deel van ŉ Amerikaanse verkiesingsveldtog vir George W. Bush.

In sy podsending, Wêreldwys, in samewerking met Maroela Media, gesels Jaco tweeweekliks oor die belangrikste wêreldgebeure waarvan Suid-Afrikaners moet kennis neem. Verder verskyn sy artikels gereeld in Rapport en gesels hy op talle radiostasies oor wêreldgebeure.

Wanneer die Amerikaanse verkiesing op 5 November plaasvind, sal Jaco in Amerika wees om vir Suid-Afrika eerstehandse inligting te stuur. Daarna toer hy vir drie weke onder meer deur Michigan, Wisconsin en Texas om Suid-Afrika en die Solidariteit Beweging se sake met belanghebbendes te bespreek.

Jaco antwoord ŉ paar vrae oor die verkiesing, waarom Suid-Afrikaners op hoogte moet wees van die jongste nuus en wat die uitslag van die verkiesing vir Suid-Afrika inhou.

Die belangrikste vraag eerste: Wie dink jy gaan die verkiesing wen?

As ek ŉ raaiskoot kan waag, sal ek voorspel dat Trump gaan wen. Trump is in ŉ sterker posisie in die peilings as in 2016 en 2020, maar ook in terme van Amerikaners se persepsie van hom, sy beleid en sy persoonlikheid. Kamala Harris word deur baie Amerikaners as té ekstreem beskou en ook as iemand wat bloot die Biden-beleid sal voortsit. Trump behoort te wen, maar dit kom uiteindelik alles neer op wie gaan stem. In die VSA stem hoogstens tweederdes van kiesers. Daardie derde wat tuisbly, kan ŉ kandidaat se oorwinning kos.

Watter voordele hou dit vir Suid-Afrika in sou die Republikeinse party wen?

ŉ Trump-oorwinning kan groot ekonomiese geleenthede én risiko’s meebring. Die grootste geleenthede is vir handel, aangesien Trump groot stappe teen China beplan. Dit skep nuwe geleenthede vir Suid-Afrika om nóg meer produkte na die VSA uit te voer.

Republikeine, Trump en die verlede het reeds gewys dat daar groot geleenthede vir Afrikaners bestaan indien die Republikeinse party wen, aangesien hulle dikwels meer geneig is om die ANC se beleid teenoor minderhede, veral Afrikaners, asook die ANC se denke oor sosialisme en simpatie met byvoorbeeld Rusland, Iran, Kuba en Venezuela, te veroordeel.

Skakel die Solidariteit Beweging eerder met die Republikeine of die Demokrate?

Ons skakel met beide Republikeine en Demokrate, en het geen motief om kant te kies nie. Ek sal oor die volgende drie weke met lede van beide partye regoor Amerika en veral in Washington DC ontmoet. In die Amerikaanse kongres is daar baie Republikeine en Demokrate wat in die gebeure in Suid-Afrika belangstel en met wie ons reeds goeie kontakte opgebou het.

Behalwe vir persoonlike nuuskierigheid en vermaaklikheidsredes, hoekom dink jy is dit belangrik dat Suid-Afrikaners op hoogte bly van die politieke gebeure in Amerika?

Amerika is steeds die magtigste supermoondheid in die wêreld en dit gaan nog vir ŉ hele paar jaar die geval wees. Suid-Afrika is ekonomies baie afhanklik van handel met die VSA en van beleggings uit dié land. Wat in Amerika gebeur, raak ons almal omdat dit ŉ invloed op ons wisselkoers sowel as kommoditeitspryse, handelsbetrekkinge en globale politieke en ekonomiese veranderlikes het.

Waar kan Suid-Afrikaners inskakel om eerstehandse inligting van jou te kry oor die verloop van die verkiesing?

Die Suid-Afrikaanse media, en veral die Afrikaanse media, doen baie moeite om behoorlik oor die Amerikaanse verkiesing te berig. Ek sal self voor en ná afloop van die verkiesing op Maroela Media, Pretoria FM, RSG, Nuuspod en ander Afrikaanse media hieroor berig. Daar sal dus ŉ goeie aanbod van nuus oor die verkiesing in ons eie Afrikaanse media wees.

Vertel ŉ bietjie meer oor die res van jou besoek en die hoogtepunte waarna jy uitsien.

Ek werk die afgelope twee jaar aan bande met wetgewers in verskillende deelstate. Ons is op die punt om belangrike resolusies in wetgewers in sommige deelstate in te stel. Dit kan verrykende gevolge hê.

Verder het ons baie goeie kontakte in Washington DC by die kongres en by organisasies wat politieke beleid beïnvloed. Ek gaan hier met tientalle invloedryke persone skakel oor verskeie kwessies soos die regering van nasionale eenheid (RNE), Agoa, die posisie van minderhede in Suid-Afrika, die Bela-wet, die beplande NGV, misdaad, Brics, die ANC se bande met Rusland, China en Iran, en die werk van die Solidariteit Beweging.

Jaco Kleynhans is die hoof van internasionale skakeling by die Solidariteit Beweging. — Jaco Kleynhans is die hoof van internasionale skakeling by die Solidariteit Beweging en gaan in Amerika wees tydens die verkiesing.

Afrikaners en Zoeloe-gemeenskappe wil saamwerk

Posted on Oktober 24, 2024 by anneke

Bron: aangepas van AfriForum

ŉ Herdenkingsgeleentheid is op Vrydag 18 Oktober vir die voormalige Zoeloekoning, koning Dinuzulu (1868-1913), op die plaas Rietfontein (KwaThengisangaye) gehou.

Die huidige Zoeloe-koning, Koning Misuzulu KaZwelithini, het AfriForum (’n instelling van die Solidariteit Beweging) na die geleentheid genooi. Vir dié twee partye is dit die begin van formele gesprekke van samewerking tussen die Zoeloe-gemeenskappe en die Afrikaners.

Koning Misuzulu KaZwelithini wil hê die gesprekke moet handel oor samewerking op die terreine van die ekonomie, gemeenskapsveiligheid, grondbestuur en kultuuruitruiling en ander sake van gemeenskaplike belang.

Dié geleentheid het plaasgevind op die plaas waar koning Dinuzulu op 18 Oktober 1913, presies 111 jaar gelede, in ballingskap oorlede is.

ŉ Kort agtergrond oor die Afrikaners en die Zoeloes

Talle mense wat nie so vertroud is met die geskiedenis nie, verkeer onder die indruk dat die Afrikaners en die Zoeloes ŉ geskiedenis van konflik het en vandag steeds in vyandskap voortleef. Hierdie persepsie dateer terug na die gebeure tydens die Groot Trek.

Onder die heerskappy van koning Dingaan, ŉ wrede Zoeloe-koning, het duisende Zoeloes onder sy bevel onskuldige vroue, kinders en gesinne uitgemoor tydens die Slag van Bloukrans. Die Trekkers het hierop wraak geneem met die Slag van Bloedrivier waar bykans tien duisend Zoeloes gesneuwel het.

Ná hierdie gebeure en koning Dingaan se afsterwe, het die Voortrekkers, vandag die Afrikaners, met die Zoeloes vrede gemaak. Die Afrikaners was selfs by die inhuldiging van Dingaan se opvolger, koning Mpande. Die Afrikaners en Zoeloes het daarna by talle geleenthede sy aan sy geveg en saamgewerk waar die geleentheid hom voorgedoen het.

Hierdie samewerking en vrede word veral gesien aan die verhouding wat koning Dinuzulu met die Afrikaners gehad het.

Tydens die Bambata-rebellie teen Britse kolonialiste in 1906, is koning Dinuzulu tronkstraf in Newcastle opgelê. Met Suid-Afrika se uniewording, het die nuwe eerste minister, Louis Botha, opdrag gegee dat die Zoeloe-koning vrygelaat word.

Ná sy vrylating is koning Dinuzulu toegelaat om hom op die plaas Rietfontein te vestig waar hy ook sy laaste jare deurgebring het. Hy was welbekend aan Botha, omdat Botha as ŉ jong man deel van die kommando van kmdt. Lucas Meyer was wat koning Dinuzulu bygestaan het tydens die oorwinning oor die Mandlakazi, ŉ Zoeloe-faksie, tydens die Slag van Spookberg (Tshaneni) in 1884.

Tydens hierdie herdenkingsgeleentheid is daar terugverwys na die verhouding tussen generaal Louis Botha en koning Dinuzulu.

Wat hou die toekoms in?

In sy toespraak het die koning onder meer beklemtoon dat die “historiese bondgenootskappe” wat tussen die Afrikaners en Zoeloes bestaan het, “ŉ herinnering is aan die kompleksiteite en nuanses van ons verlede.”

“Die verhoudinge wat tussen koning Mpande, koning Dinuzulu en die Boereleiers bestaan het, herinner ons aan die ingewikkelde web van diplomasie en bestandheid wat ons geskiedenis gekenmerk het,” het koning Misuzulu KaZwelithini gesê.

Volgens Mwalela Cele, adjunkhoof van Navorsing en Innovasie by Amafa, is die KwaThengisangaye-terrein ŉ bevestiging van die rol wat erfenis kan speel in die bevordering van vreedsame naasbestaan.

“Die terrein en die geskiedenis en erfenis wat daarmee verbind word, bevestig dat daar meer is wat ons saambind as wat ons in hierdie pragtige land verdeel. Dit is vir Amafa baie belangrik dat terreine soos dié bewaar word en dat gedenktekens en -panele opgerig word sodat dit vir die komende geslagte bewaar kan word en sodat mense hul geskiedenis sal kan ken,” verduidelik Cele.

Barend Uys, hoof van Interkulturele verhoudings en samewerking by AfriForum, het tydens die herdenkingsgeleentheid onder meer daarop gewys dat die huidige geslag ook, soos vorige geslagte, die verantwoordelikheid het om ŉ toekoms vir die nageslag te verseker. Hy hou vol dat al die volke in die land groot uitdagings in die gesig staar, maar dat oplossings wink.

“AfriForum glo dat al die kultuurgemeenskappe op die grondslag van wedersydse erkenning en respek moet saamwerk oor sake wat vir ons belangrik is. Die historiese vraagstuk wat ons geslag moet oplos, is die vreedsame naasbestaan van al die volke wat die suidpunt van Afrika hul huis noem. Wat vandag hier gebeur, kan dien as ŉ goeie begin om vreedsame naasbestaan te verseker. Ons is besig om vertroue te bou. Ons is besig om die moeilike gesprekke te hê wat nodig is om egte versoening tussen volke te bewerkstellig.”

Uys het koning Misuzulu se positiewe reaksie op ŉ versoek om ŉ dialoog met die Afrikanergemeenskap, verwelkom.

“Ons sien baie uit daarna om in gesprek te tree met die koning oor die kwessies wat ons onderskeie gemeenskappe raak en om met die koning saam te werk,” verduidelik Uys.

“AfriForum en Afrikaners kies om in geregtigheid voort te bestaan. Ons kies wedersydse erkenning en respek. Ons kies vreedsame naasbestaan. Ons beleef dat die ander volke in die land, en veral die tradisionele leiers, ook dié keuse maak en vandag se vieringe was ŉ uitsonderlike voorbeeld daarvan. Ons is ook baie dankbaar vir die groot voorreg dat koning Misuzulu hierdie geleentheid bygewoon het en as hoofspreker opgetree het.”

Barend Uys van AfriForum, Frikkie Meyer (tolk) en koning Misuzulu KaZwelethini.

Verslag: Lesufi se Gauteng sál Bela soos ŉ byl gebruik

Posted on Oktober 21, 2024Oktober 21, 2024 by anneke

18 Oktober 2024

Connie Mulder

Die Gautengse Departement van Onderwys (GDO) se lang geskiedenis van vyandige uitsprake teenoor Afrikaanse enkelmediumskole dien as bewys van hoe gevaarlik die Wysigingswet op Basiese Onderwyswette (Bela) in die hande van dié soort amptenare sal wees.

Hierdie vyandige uitsprake deur onder andere die Gautengse premier, Panyaza Lesufi, en sy opvolger as LUR vir Onderwys in Gauteng, Matome Chiloane, word vervat in ŉ verslag van die Solidariteit Navorsingsinstituut (SNI) wat vandag uitgereik word.

Volgens Connie Mulder, hoof van die SNI, bied die uitsprake, asook die optrede van die amptenare genoeg rede om te verwag dat die nuwe magte wat Bela aan die GDO verleen aggressief teen Afrikaans ingespan sál word.
“Bela word gevolglik soos ŉ vlymskerp byl in die hand van iemand wat lank reeds jeuk om ŉ kosbare boom af te kap. Daardie boom is Afrikaanse onderrig.

“ŉ Patroon het oor die afgelope jare ontstaan wat wys hoe die Gautengse Departement van Onderwys, en spesifiek Lesufi en Chiloane, Afrikaanse enkelmediumskole in werklikheid sien as iets wat in die naam van transformasie uitgeroei moet word,” het Mulder gesê.
In die verslag toon die SNI ook aan hoe dit reeds in praktyk sigbaar was toe die departement in 2018 onregmatig Engelse leerders by die Hoërskool Overvaal probeer plaas het.

Solidariteit glo die Bela-artikels oor taal- en toelatingsbeleid sal dus deur hierdie einste amptenare gebruik word om opdrag aan Afrikaanse enkelmediumskole te gee om voortaan dubbelmedium-onderrig aan te bied.

Die Bela-wet se bewoording oor taalbehoefte bepaal hoe genoegsame oorweging aan ŉ skooldistrik se taaldemografie gegee moet word.
Volgens Mulder plaas dit Afrikaanse skole in die spervuur aangesien Afrikaans in geen onderwysdistrik meer as 30% van die taalbehoefte verteenwoordig nie.

“Net sowat 5% van skole in die land is uitsluitlik Afrikaans. Onder Bela sal dié enkelmediumskole tot niet gaan om aan die sogenaamde taalbehoefte van die distrik te voldoen, tensy ŉ departementshoof gewillig is om die skole te beskerm.
“Ons weet die Gautengse onderwysdepartement het hopeloos misluk met die bou van skole, en in Lesufi se ampstermyn as LUR vir onderwys was daar ŉ negatiewe groei in skole,” sê Mulder.

In die verslag word uitgewys hoe daar na afloop van Lesufi se termyn in der waarheid nege minder skole in Gauteng was, maar sowat 300 000 meer leerders.

Om na die leerder-skool-verhouding van 2009 terug te keer, sal die GDO, volgens Mulder, onmiddellik 552 nuwe skole moet bou – eerder as die getal van 60 skole wat Lesufi aanvoer nodig is om in die groeiende vraag na onderwys in die provinsie te voorsien.

Mulder het verder na die regering se versuim om in die vraag na skole te voorsien, verwys as ’n ongemaklike feit wat Lesufi en kie graag wil toesmeer deur goed funksionerende Afrikaanse skole te kaap.

Lees die volledige verslag oor Bela se impak op Gauteng hier.
Lede van die media kan ook na hierdie video van Connie Mulder kyk waarin hy hierdie Bela-verslag uiteensit.

Connie Mulder, hoof van Solidariteit Navorsingsinstituut (SNI)

KYK | ‘n Historiese optog: Ernst Roets gesels met Dirk Hermann

Posted on Oktober 16, 2024Oktober 16, 2024 by anneke

Ernst Roets gesels gesels met Dirk Hermann oor die Bela-wet, die gesprekke wat tans aan die gang is met die regering en die historiese protesaksie die 5de November.

Registreer jou plek vir die protesaksie hier: www.belaprotes.co.za

Deel gerus met jou vriende en familie.

Die Amerika wat Suid-Afrika wil hê

Posted on Oktober 14, 2024 by anneke

Theuns du Buisson

Bron: Maroela Media

In die laaste deel van elke jaar reik talle organisasies hul lys van wêreldrisiko’s vir die volgende jaar uit, waarvolgens groot ondernemings dan hul beplanning doen om te sorg dat hulle daarteen verskans is.

Benewens al die gewone goed, natuurrampe en politieke onsekerheid en so aan, is daar vanjaar ŉ nuwe een. “Trump se proteksionisme,” wat volgens die Wêreld Ekonomiese Forum (WEF) ŉ beduidende risiko vir die wêreldekonomie inhou. Ek steur my nog nooit juis aan die WEF se praatjies oor hoe die aardbol enige oomblik gaan verbrand as almal nie ons beesvleis vir goggas verruil nie, maar ongelukkig steur baie invloedryke mense hulle wel daaraan.

Proteksionisme

Hierdie uitgediende beleid word allerweë beskou as ŉ groot struikelblok vir ekonomiese groei. Met reg ook. Dit behels dat tariewe ingestel word om invoere uit te hou, om dan die plaaslike industrie te bevorder. So het Suid-Afrika byvoorbeeld tariewe op staalinvoere en hoendervleis. Die uiteinde daarvan is dat staal en hoender baie duurder is, sonder dat ons ŉ noemenswaardige hoenderbedryf het en terwyl die plaaslike staalsektor steeds onder ewige druk bly.

Kortliks is proteksionisme op die drogrede dat daar wenners en verloorders in handel is gebaseer. Die werklikheid is dat almal wen in behoorlike handel.

Tariewe word egter ook vir ander redes ingestel. As ŉ land byvoorbeeld slawe-arbeid gebruik, kan tariewe ingestel word om die uitvoerder te straf, sonder om op te hou om daardie produkte te koop. Al wie eintlik so gestraf word, is die verbruiker van hierdie produkte, omdat hulle meer daarvoor betaal en steeds hul gewetens moet sus oor hulle die produkte van slawerny gebruik. Dan is daar ook ander oorwegings, soos enorme tariewe op Chinese CCTV-toerusting, wat volgens verskeie kenners gebruik word om op die hele wêreld te spioeneer. Die bekendste is teenstortingstariewe, wat ingestel word om te voorkom dat ŉ ander land hul goedkoop, dikwels minderwaardige, produkte in ŉ land stort, die plaaslike bedryf vernietig, en dan in die toekoms weer produkte teen normale pryse en volumes aanhou uitvoer sonder die las van ŉ kompeterende mark.

Ongeag die redes, is dit ŉ aanvaarde waarheid dat enige handelsbeperkinge, of dit nou kwotas, tariewe of wat ook al is, sleg is vir die globale ekonomie. Daar word bereken dat die wêreldekonomie kan verdubbel as alle lande toegelaat word om hul spesialisprodukte sonder tariewe of ander hindernisse uit te voer.

Hoe gevaarlik is dit vir Suid-Afrika?

Net soos wat bykans almal aanvaar dat handelsbeperkinge en tariewe sleg is, aanvaar almal ook dat die beste vir Amerika ook die beste vir die wêreld is. As dit goed gaan met Amerika, gaan dit goed met die wêreld. Wanneer hierdie twee algemene waarhede strydig met mekaar is, word die water vertroebel.

Nuwe tariewe en ander handelsbeperkings maak produkte en dienste vir Amerikaners duurder, maar dit skep ook werksgeleenthede en ŉ meer gelokaliseerde ekonomie in Amerika. Saam met lokalisasie kom ander risiko’s wat oor die langer duur tot die VSA se nadeel kan wees. Maar dan is daar ook talle voordele. Deur fabrieke terug na die VSA te skuif, word groot kapitaalbeleggings aangegaan en selfs al speel baie van die risiko’s wel uit – sal dit baie onwaarskynlik wees dat hierdie beleggings ongedaan gemaak sal word deur weer aanlegte na die buiteland te verskuif.

Die grootste voordeel van so ŉ beleid is dat die VSA energie-onafhanklikheid sal nastreef. Hulle produseer hul eie olie, en met Trump se voorgestelde beleid in plek, genoeg vir hulle eie behoeftes en selfs uitvoere. Dit beteken dat die vraag na die res van die wêreld se olie daal, met die gevolg dat almal, nie net Amerika nie, minder vir energie betaal. Almal wen dus hier en in die energie-intensiewe wêreld van vandag is dit niks om ons neuse voor op te trek nie.

Waar Suid-Afrika, en almal anders, wel direk geraak word, is uitvoere na die VSA. Ook hier hoef Suid-Afrika nie te bekommerd te wees nie. Die meeste van ons uitvoere is rou materiaal en chemikalieë waarop daar selde, indien ooit, tariewe geplaas word. En selfs al sou dit gebeur, geniet Suid-Afrika tariefvrye status onder AGOA vir hierdie produkte. Ook die motorbedryf, wat direk in Trump se visier is, geniet hierdie voordeel. Ons plaaslike bedrywe sal dus ŉ baie sterk kompeterende voordeel geniet. Tensy AGOA tot ŉ einde kom, of hierdie bedrywe plaaslik tot niet gaan, het ons min om oor te bekommer.

Is dit dan regtig ŉ risiko?

Enige beleid wat ekonomiese groei onderdruk, of wat dit op een plek konsentreer op grond van mensgemaakte omstandighede is sleg. Dit is ook uiteraard ŉ risiko. Maar vir Suid-Afrika sal die grootste risiko eerder wees dat ons regering aanhou om vyandig teenoor die Weste op te tree en ons so uit AGOA geskop word. Onder daardie omstandighede sal ŉ meer proteksionistiese beleid in Amerika slegs nadele vir ons inhou, sonder dat wesenlike voordele ons te beurt val.

Hierdie is natuurlik ook alles net van toepassing as Trump wel weer die Withuis inneem. Die alternatief is nog vier jaar van powere groei en grootskaalse vermorsing deur die Amerikaanse regering. En dit is vir niemand goed nie.

heuns du Buisson is 'n ekonomiese navorser by die Solidariteit Navorsing Instituut (SNI) — Theuns du Buisson is ‘n ekonomiese navorser by die Solidariteit Navorsing Instituut (SNI)

Bela-optog: Gee één dag vir die toekoms van ons kinders

Posted on Oktober 14, 2024 by anneke

Bron: Solidariteit.co.za

Die dag van protes teen die Wet op Basiese Onderwys (Bela) gaan op Dinsdag 5 November in Pretoria plaasvind. Volgens Flip Buys, voorsitter van die Solidariteit Beweging, word daar met hierdie dag gevra dat die publiek één dag opgee vir die toekoms van ons kinders.
Dié dag word deur die Solidariteit Beweging, waaronder Solidariteit, AfriForum en die Skoleondersteuningsentrum (SOS) sorteer, georganiseer. ŉ Breë front van ander Afrikaanse organisasies asook ander onderwysorganisasies gaan ook deelneem. Tientalle beheerliggame het ook aangedui dat hulle ouers gaan mobiliseer vir die protes en ŉ groot aantal tradisionele leiers wat sterk voel oor moedertaalonderrig gaan saam protesteer.

Volgens Buys gaan die onderhandelinge met verskeie partye rakende Bela voluit voort. “Daar is ŉ magsbalans in onderhandeling nodig. Die protessaamtrek- en optog is noodsaaklik om ons protes in die openbaar te wys. Hierdie is nie ŉ klein politieke geskil nie. Dit gaan oor die oorlewing van ŉ taal- en kultuurgemeenskap,” sê Buys.

Die optog sal by die Voortrekkermonument begin, waarvandaan almal saam na Freedom Park sal beweeg.
Buys sê Freedom Park simboliseer eenheid en verskeidenheid vir die regering. President Ramaphosa het gesê die doel van die uitstel van die implementering van artikels 5 en 6 van die Bela-wet is ter wille van eenheid. Ons glo dat Bela eenheid bedreig en verskeidenheid vernietig. Dis hoekom ons die regering by Freedom Park wil ontmoet.

Deelnemers aan die optog word gevra om vanaf 08:00 die oggend by die Voortrekkermonument aan te meld en verrigtinge sal vanaf 10:00 posvat. Deelnemers word aangemoedig om te registreer en gemaklike skoene aan te trek.

Om aan die dag van protes deel te hê moet ŉ kort registrasievorm op www.belaprotes.co.za voltooi word.

Die Bela-wet se artikels 5 en 6 vat die finale sê oor die toelating- en taalbeleid by ŉ skool van die beheerliggaam en die ouer weg, en gee dit oor aan ŉ staatsamptenaar wat dan die mag het om dié beleide te verander.

Pres. Cyril Ramaphosa het in September vanjaar onderneem om vir drie maande lank dié artikels nie te implementeer nie, sodat gesprek daaroor gevoer kan word en onderhandelinge kan plaasvind.

Volgens Buys moet daar in dié tydperk soveel as moontlik druk op die regering geplaas word sodat daar ŉ skikking bereik kan word.

“Ons tyd is dus min. Ons doen ŉ beroep op beheerliggame en ouers om in groot getalle te mobiliseer om só te help om Bela te stop. Ons doen ŉ beroep op jou, asook jou vriende en familie om in groot getalle op te daag. Dit is een dag se stap vir die toekoms van ons kinders,” sê Buys.
Volledige besonderhede oor die Bela-protesoptog kan saam met die registrasievorm op www.belaprotes.co.za gekry word.

Bela-protesoptog:
Wanneer: Dinsdag 5 November 2024 vanaf 08:00
Waar: Voortrekkermonument (na Freedom Park)

Groter Afrikaanse gemeenskap besluit op dag van protes teen Bela

Posted on Oktober 10, 2024Oktober 14, 2024 by anneke

Bron: Solidariteit.co.za

ŉ Dag van massaprotes gaan oor minder as vier weke van nou teen die Wet op Basiese Onderwys (Bela) gehou word om só die sterkste boodskap van weerstand nóg teen die gewraakte artikels wat in dié wet vervat word uit te stuur.

ŉ Resolusie is vandag tydens ŉ Bela-aksieberaad in Pretoria deur tientalle organisasies verteenwoordigend van die groter Afrikaanse gemeenskap aanvaar om ŉ dag van protes teen Bela se artikels oor taal- en toelatingsbeleid aan te kondig.

Lede van verskeie Afrikaanse organisasies, instellings van die Solidariteit Beweging, lede van skoolbeheerliggame, onderwysers, ouers en voorstanders van moedertaalonderwys uit alle gemeenskappe gaan volgens beplanning op Dinsdag 5 November ŉ protesoptog in Pretoria hou om hulle bekommernis oor Bela aan die groot klok te hang.

Dié besluit om protesaksie te neem tel onder die verskeie resolusies wat aanvaar is by die Bela-aksieberaad wat deur die Solidariteit Beweging, Solidariteit, AfriForum en die Solidariteit Skoleondersteuningsentrum (SOS) gelei is.

Ander stappe waarop daar gesamentlik besluit is, is onder meer:
–   om voort te gaan met hofaksie indien Bela in sy huidige formaat geïmplementeer word;
–   om die DA en VF+ te vra om hulle deelname aan die regering van nasionale eenheid op te skort indien Bela in sy huidige formaat geïmplementeer word;
–   om met alles wat ons het Afrikaanse skole en Afrikaans ín skole te beskerm; en
–   om moedertaalonderrig in die algemeen te bevorder.

Flip Buys, voorsitter van die Solidariteit Beweging, sê hierdie resolusies is ŉ belangrike oomblik in nóg ŉ oorlewingstryd vir Afrikaans.
“Hierdie stryd kom reeds twee eeue ver. Dit is presies 200 jaar sedert Lord Charles Somerset se direktief dat Engels voortaan die enigste taal in die Kaapkolonie se skole sou wees. Nou sit ons weer met ŉ regering wat Afrikaanse skole wil verengels om politieke doelwitte te bereik,” sê Buys.

Leon Fourie, uitvoerende hoof van die SOS, sê verteenwoordigers van nagenoeg 50 belanghebbende organisasies en meer as 70 skole het die aksieberaad bygewoon en die resolusies aanvaar.

“Die wet sentraliseer mag in die hande van die staat en ontneem gemeenskappe van hulle reg op inspraak by skole. Deur die beperking van beheerliggame se magte word die gemeenskappe se skole aan groter risiko van politieke inmenging blootgestel,” sê Fourie.
Kallie Kriel, uitvoerende hoof van AfriForum, sê hierdie resolusies wat geneem is, is kritiek noodsaaklik in die lig van die ernstige implikasies van die wetgewing.

“Afrikaanse skole speel ŉ sleutelrol in Afrikaanse kultuurgemeenskappe en daarom is die aanslag op Afrikaanse skole en kinders ŉ daad van aggressie wat ons kultuurgemeenskappe se voortbestaan bedreig. Ons sal Bela se anti-Afrikaanse artikels met alles wat ons het beveg,” sê Kriel.

Volgens dr. Dirk Hermann, bestuurshoof van Solidariteit, is die besluit om ŉ protesoptog te organiseer ligtelik geneem nie.
“Ons móét soos vorige geslagte opstaan vir Afrikaanse onderrig en die belangrike kultuuroordrag wat daarmee saamgaan. Ons kan nie toelaat dat daar oor ŉ honderd jaar van nou verwytend teruggekyk word en gesê word die geslag van 2024 het sy nageslag versaak nie,” sê Hermann.

Meer inligting oor die dag van protes sal binnekort bekendgemaak word.

Die minister van basiese onderwys, Siviwe Gwarube, was ook teenwoordig by die beraad. Sy het tydens haar toespraak gesê die oplossing vir die verskille rakende Bela lê in dialoog, samewerking en wedersydse respek.
Die minister het ook verskeie kere herhaal dat sy glo die verskille oor Bela is nie onoorkombaar nie.
Sy het ook erken die outonomie van beheerliggame oor toelating- en taalbeleide was nog altyd ŉ kernpilaar van basiese onderwys in Suid-Afrika.

Onder die ander organisasies en politieke partye teenwoordig tydens die ondertekening was die Federasie van Beheerliggame van Suid-Afrikaanse Skole (Fedsas), die Suid-Afrikaanse Onderwysersunie (SAOU), die DA, VF+ asook tradisionele leiers.
• Klik hier vir die resolusies wat op die Bela-aksieberaad geneem is .
• Klik hier om die moontlike implikasies van die Bela-wet, soos voorsien word deur instellings van die Solidariteit Beweging, te lees.

Akademia en Kanton stel monumentale kampusontwikkeling bekend

Posted on Augustus 1, 2024Augustus 7, 2024 by anneke

Die eiendomsontwikkelingsmaatskappy Kanton het vandag op 1 Augustus die nuwe kampusontwikkelingprojek van Akademia in Pretoria as deel van die Toekomsbouer-veldtog bekendgestel. Dié kampusprojek is die grootste ontwikkelingsprojek in die geskiedenis van die Afrikaanse taal- en kultuurgemeenskappe en verteenwoordig ’n groot historiese keerpunt om die volhoubaarheid van hoër onderwys in Afrikaans te verseker. Akademia maak sedert 2012 van tussentydse infrastruktuuroplossings gebruik. Die voltydse kampusmodel het in 2021 aanvang geneem en so uitgebrei dat daar tans twee kampusse, vier koshuise, twee daghuise sowel as die administratiewe hoofkantoor is wat tans oor verskeie persele in Centurion versprei is. Die nuwe omvattende residensiële kampus in die ooste van Pretoria sal aan die instelling die geleentheid bied om sy groei oor die afgelope dekade te konsolideer en ’n vaste adres vir sy toekomstige kampusstudente te bied wat ’n veerkragtige en opwindende studentelewe gaan ondersteun. “Die nuwe kampus is die verwesenliking van ’n groot droom. Dit vereis die krag van ’n belynde gemeenskap wat deur eensgesindheid en samewerking die oënskynlik onmoontlike kan verwesenlik,” sê Marthinus Visser, besturende direkteur van Akademia. “In die lig hiervan is die Toekomsbouer-veldtog ’n oproep aan die gemeenskap om deel te word van ’n ongelooflike geleentheid – iets soos wat die Afrikaanse taal- en kultuurgemeenskappe nie in ’n geruime tyd beleef het nie. Dit bied ’n geleentheid waar hoop en ’n nalatenskap fisies opgerig gaan word.”

Projekomvang

Die ontwikkeling sal in Pretoria geleë wees, agt kilometer vanaf Solomon Mahlangu-rylaan op die Boschkop-pad in die ooste van Pretoria. Die nuwe kampus bied aan Akademia die geleentheid om ’n volledige en uitgebreide akademiese programaanbod oor al sy fakulteite beskikbaar te maak wat aan die omvattende vraag van voornemende studente sal voldoen. Dié kampus sal voorts voorsiening maak vir 5 000 voltydse voorgraadse studente en nagenoeg 1 500 nagraadse studente. Vier mans- en vier dameskoshuise sal 1 500 studente op die kampus kan huisves. “Fase een van die projek sal nagenoeg R1,8 miljard beloop en op 1 Januarie 2028 voltooi wees, terwyl die totale ontwikkelingskoste meer as R3 miljard sal wees. Die tweede fase behels die voltooiing van die akademiese kampus en koshuise waarna die sportfasiliteite, kapel en ouditorium volg,” verduidelik Henk Schalekamp, besturende direkteur van Kanton. “Ons gaan ’n reusemonument vir Afrikaanse hoër onderwys oprig. Dit gaan kantoorblokke, lesingsale, laboratoriums, ’n ouditorium, doelgerigte navorsingslokale, ’n kafeteria, restaurante, koffiewinkels, ’n studentesentrum, biblioteek, koshuise, personeelverblyf én wêreldklas sportfasiliteite vir rugby, krieket, netbal, tennis, atletiek, hokkie, swem en binnenshuise sportsoorte insluit,” voeg Schalekamp by. “Daar word ook ’n proefplaas vir die Natuurwetenskappe- en Landboufakulteite beplan.”

Marthinus Visser (links) en Henk Schalekamp (regs)

Projekvennote en finansiering

Kanton dien as voertuig vir die finansiering van die ontwikkeling van die nuwe Akademia-kampus. Kanton is gebore uit ’n innoverende nuwe benadering vir die ondersteuning van Afrikaanse kulturele instellings. “Ons sakemodel is gebaseer op ’n vennootskap tussen kultuur en kapitaal wat die doelstellings van gemeenskapsinstellings bevorder deur toegang tot die nodige leefruimtes te bied, maar dan ook as ’n volwaardige eiendomsbeleggingsmaatskappy beide ’n finansiële en kulturele opbrengs aan sy beleggers te bied,” verduidelik Schalekamp. Kanton se sukses word bevestig deur die Sol-Tech-kampus, wat betyds en binne begroting afgelewer is. Deur projekte soos ’n koshuis vir Sol-Tech en nou ’n kampus vir Akademia te ontwikkel, bewys Kanton sy vermoë om portefeuljes winsgewend te laat groei en bestuur. Dit terwyl eksterne beleggers ook die geleentheid gebied gaan word om deel te vorm van hierdie unieke geleentheid,” sê Schalekamp. Om te verseker dat die struktuur en beleggingsplatform die doelwitte van Kanton ondersteun, is die beplanning en strukturering van die maatskappy gedoen in samewerking met Pallidus. Laasgenoemde spesialiseer in onafhanklike korporatiewe finansiële advies, beleggingsbankdienste en beleggingsbestuur om die groei en uitbou van Kanton in die verskillende fases moontlik te maak. Die befondsingsmodel het die eienskappe van normale eiendoms- en infrastruktuurmodelle en word gebruik om beleggingsgeleenthede te bied. Kanton gaan aanvanklik instellings en welvarende individue nader om betrokke te raak deur ’n belegging. Ná afloop van ’n kritiese hoeveelheid fondse wat gewerf is vir die projek om voort te gaan sal ’n geleentheid aan die gemeenskap gebied word om deur kleiner beleggings betrokke te raak. Vir nou is die oproep aan elkeen wat saam met vennote opgewonde is oor die projek eenvoudig: Droom saam deur ’n toekomsbouer te word en die vordering van hierdie groot projek te volg by www.toekomsbouer.co.za. Verdere inligting vir individuele beleggings sal weldra aan veldtogdeelnemers bekendgemaak word.

Medianavrae:

media@kanton.co.za

Meer oor Akademia

Akademia is ’n Christelike, klassieke en onafhanklike hoëronderwysinstelling vanuit en vir Afrikaanse taal- en kultuurgemeenskappe. Akademia streef daarna om ’n akademiese tuiste te bied waar denke én hart gevorm word met die oog op ’n vrye toekoms. Studente het ’n keuse tussen nauurse afstandstudie oor ’n landwye netwerk van sentrums of via e-leer en voltydse studie by twee tussentydse kampusse in Centurion. Die nauurse afstandmodel is ideaal vir studente wat wil werk of ander belangstellings nastreef, terwyl hulle studeer. Die voltydse kampusmodel bied sedert 2021 ’n veilige tuiste vir Fonties (Akademia-studente) wat bedags wil klasdraf en aan ’n bruisende studentelewe wil deelneem. Klik hier vir meer inligting oor Akademia.

Afrikanerstigting, AfriForum werf steun in VSA

Posted on Julie 30, 2024Julie 30, 2024 by anneke

Bron: Maroela Media

Die internasionale samelewing word toenemend bewus van die uitdagings waarmee minderhede soos Afrikaners in Suid-Afrika gekonfronteer word, sowel as die soort oplossings waarmee die instellings van die Solidariteit Beweging vorendag kom om hierdie uitdagings die hoof te bied. Dit is die oorhoofse waarneming van die verteenwoordigers van die Afrikanerstigting en AfriForum wat sopas van ŉ steunwerwingstoer na die VSA teruggekeer het.

Tydens hierdie besoek het Ernst Roets, uitvoerende direkteur van die Afrikanerstigting, en Ernst van Zyl, hoof van openbare betrekkinge van AfriForum, aan verskeie konferensies, funksies en netwerkgesprekke deelgeneem. Twee hoogtepunte van die besoek was die NatCon-konferensie in Washington, D.C. (ook bekend as NatCon 4), waartydens Roets as spreker opgetree het en die bekendstelling van die Afrikanerstigting in New York by ’n geleentheid wat deur die New York Young Republicans aangebied is. Roets het by albei hierdie geleenthede verwys na die roekelose beleidsraamwerk van die Suid-Afrikaanse regering en die oplossings waarmee Afrikaners onder hierdie omstandighede vorendag kom om ’n vry, veilige en voorspoedige toekoms aan die suidpunt van Afrika te skep. In hierdie verband is die klem veral gelê op die bou van ŉ netwerk van gemeenskapsinstellings.

Ernst Roets tydens ‘n geleentheid van die New York Young Republicans

Roets het gesê dat dit nodig is om die soort probleme waarmee minderhede soos Afrikaners in Suid-Afrika gekonfronteer word onder die internasionale samelewing se aandag te bring, juis omdat daar nou al vir ’n geruime tyd ’n persepsie bestaan dat die Suid-Afrikaanse politieke bedeling ’n soort goudstandaard is wat deur die res van die wêreld nagevolg word, terwyl die teenoorgestelde in vele opsigte waar is. “Dit is egter veel belangriker om oor oplossings as oor probleme te praat. Ons ervaring is dat dit veral in ons benadering tot oplossings en ons optimisme oor die toekoms is dat Afrikaners in die internasionale samelewing, maar in die Westerse wêreld in die besonder, herontdek word,” het hy bygevoeg.

Van Zyl het gesê dat die opregte belangstelling in en bewondering vir Afrikaners se staatbestande oplossings dramaties toegeneem het in die buiteland, veral onder Amerikaners en Europeërs. “‘’n Boer maak ’n plan’ het uitgebrei van ’n plaaslike gesegde na ’n internasionale een. Dit is bemoedigend om te weet dat ons suksesse, en dít wat ons bou nie slegs vir ons mense in Suid-Afrika hoop gee en inspireer nie, maar óók vir mense oorsee,” sluit Van Zyl af.

Die Afrikanerstigting is ’n nuwe instelling in die breër Solidariteit Beweging en is daarop ingestel is om steun vanuit die buiteland te mobiliseer.

Trump en Vance beloof ’n ander soort Amerikaanse buitelandse beleid

Posted on Julie 22, 2024 by anneke

Nuuskommentaar vir Pretoria FM deur Jaco Kleynhans

Die groot Duitse staatsman en kanselier, Otto von Bismarck, het byna ’n eeu en ’n half gelede opgemerk dat die Verenigde State van Amerika deur swak bure in sy noorde en suide, en deur visse in sy weste en ooste gekenmerk gaan word. Bismarck se opmerking is natuurlik in ’n tyd gemaak toe die VSA nog volgehou het met redelike globale isolasie en weinig aptyt om by globale konflik of selfs net internasionale knelpunte betrokke te raak.

Uiteindelik is die VSA by die Eerste Wêreldoorlog ingetrek en ten spyte van ’n sterk afkeur vir verdere buitelandse intervensionisme is die land tydens die Tweede Wêreldoorlog uiteindelik ook weer volledig by die konflik, maar uiteindelik ook die herskikking van globale magsverhoudinge ingetrek. Die res is geskiedenis. Tydens die afgelope agt dekades het die VSA die polisieman van die wêreld geword.

Vandag is daar 90 000 Amerikaanse soldate in Europese lande soos Duitsland, Brittanje, Italië, Pole en selfs die Baltiese State, Georgië en Finland wat almal ’n grens met Rusland deel. Nog honderde duisende Amerikaanse soldate is regoor die wêreld versprei. Daar is tans 750 Amerikaanse weermagbasisse in 80 lande buite die VSA, in veral Europa, die Midde-Ooste, Asië en die Stille Oseaan-gebied.

Terwyl die natuurlike Amerikaanse inslag meer isolanisties was, het die Japanese se aanval op Pearl Harbor dit byna beëindig. Na die terugkeer na ’n uiters gereserveerde buitelandse betrokkenheid in die 1920’s en 1930’s het die Tweede Wêreldoorlog die vraag laat ontstaan of Amerikaanse isolanisme finaal beëindig is.

Die probleem is egter dat byna die hele Europa, maar ook talle lande in Asië, soos Suid-Korea en Japan, en ook talle lande in die Midde-Ooste die afgelope sewentig jaar toenemend afhanklik van Amerikaanse verdediging geraak het.

Volgens ’n onlangse peiling deur die Associated Press verkies 42% van Amerikaners dat hulle land heeltemal van globale konflik en ander internasionale probleme wegbly. Net 23% van Amerikaners voel dat hulle land meer internasionaal betrokke moet raak. Die toename in isolanisme het al tydens die later jare van die rampspoedige oorloë In Irak en Afganistan ontstaan.

Donald Trump se keuse van JD Vance as sy adjunkpresidentskandidaat verteenwoordig ‘n nuwe klem op isolanisme in die VSA. Vance verteenwoordig ’n sterk begronde en intellektuele beweging wat ten minste na die werk van Pat Buchanan in die 1990’s terugstrek en toenemend sedert 2016 onder leiding van Donald Trump weer momentum kry. Hierdie beweging vra nie vir ’n terugkeer na die soort Amerikaanse isolasie van voor die Eerste Wêreldoorlog nie, maar dring wel daarop aan dat Europa, Taiwan, Japan, Suid-Korea en selfs Israel meer moet doen om hulleself te verdedig.

Vance se benoeming het verlede week behoorlik ’n gegons in Londen, Brussel, Den Haag, Berlyn en natuurlik Kiëf veroorsaak. Die Trump/Vance-buitelandse beleid behoort egter niemand af te skrik nie. Dit is steeds gebaseer op kollektiewe verdediging met vennote, maar meer op ’n gelyke grondslag waar almal billik bydrae. Tweedens is dit gebaseer op ’n beëindiging van konflik met langtermyn skikkings en oplossings in plaas van ’n verlenging van oorloë soos in Oekraïne en die Palestynse gebiede. En derdens vereis dit ’n baie sterker fokus op die beskerming van Amerikaanse industrieë en werksgeleenthede teen onbillike internasionale handelspraktyke. Sou Trump in November verkies word, kan dit beteken dat Amerika volgende jaar ’n noodsaaklike herskikking in internasionale magsverhoudinge, handelspraktyke en die voortslepende oorloë mag sien.