Kan ’n nasionale dialoog tot praktiese oplossings lei?
Freek Robinson gesels met Flip Buys, voorsitter van die Solidariteit Beweging.
Luister gerus hier na die onderhoud Nasionale dialoog: net ’n kletskongres? – LitNet
Category: Ander Nuus
Rewolusie op die gholfbaan – Flip Buys
Die gemoedere op die jaarvergadering van Gelykheidshoop se gholfklub loop hoog. Gladdes Coetzee, plaaslike menseregteprokureur, is aan die woord: “Voorsitter, hierdie gholfklub is besig om dié simbool van ongelykheid in die land te word. Dis ʼn skánde.” ʼn Paar mense klap hande, ander knik die kop. Almal weet hoe goed Gladdes alles bedoel. Die Voorsitter probeer weer: ”Gladdes, dis ʼn tragedie dat Gholfhoogte se kampioen selfmoord gepleeg het toe hy verloor het, maar dis darem hoogs uitsonderlik.” “Uitsonderlik?” brul Gladdes. “Dis die gevolg van ongelykheid – die hoéveelste hierdie jaar in die gholfwêreld! Koerantkenners sê gholf sal doodloop as dit so aangaan.”
Slim, die plaaslike koerantman, kyk beskeie af toe hy die oë op hom voel. Hy is die kenners. Gladdes stoom voort: “Hierdie sogenaamde “uitsondering” kon vermy gewees het as daar net groter gelykheid en geregtigheid in gholf was. Ons moet nóú optree om nog ‘n tragedie te verhoed. Nóú!”. “Maar gholf het mos ‘n voorgeestelsel wat die swakker spelers ‘n gelyke kans gee, pleit-sê die Voorsitter”. “Gelyke kanse is nog nie werklike gelykheid nie”, sê Gladdes dreigend, “ek eis gelyke tellings”.
Die Voorsitter wens die vergadering is al verby. Hy boer met hoenders, wat net eiers lê en nie op hulle regte staan nie. “Gladdes, wat wil jy dan nou eintlik hê?”, vra hy moeg. “Ons benodig ‘n Akte van Gholfregte” sê Gladdes belangrik. “Is dit nie kommunisties nie”, vra Oudominee. “Moenie simpel wees nie,” brom Felix, die afgetrede plaaslike filosoof met die poniestert. “Stilte nou,” sê Slim en leun vorentoe. Hy ruik ‘n storie. As hy maar net iets in die Gelykheidsnuus geplaas kan kry, is hy weer in tel. (Hy wonder vinnig of dít dan nie ongelyk is nie.)
Akte van Gholfregte
“Ons moet die modernste akte van gholfregte in die wêreld opstel,” begin Gladdes. “Hoor, hoor!,” skree die Stadsraadslid en Jongjuffrou. “Ja,” sê Gladdes, bemoedig deur die ondersteuning. “Ons moet breek met die ou Gholforde, ons moet dit bréék sê ek jou. Ons moet begin deur al die putjies toe te gooi.” “Wat?,” skree Potties, die dorp se beste speler, en spring op. “Is jy mal?” Gladdes laat hom nie van stryk af bring nie: “Gholftellings bevoordeel net die beste spelers, moedig net ongesonde mededinging aan en lei tot ongelykheid”, sê hy. “As Gholfhoogte se kampioen nie verloor het nie, was hy vandag nog met ons.”
Tant Koekie begin treurig huil. Sy speel nie gholf nie, maar het gehoor hier word vandag oor hartseersake gepraat, en sy mis nie smart nie. Sy kyk onderlangs of Oudominee en Slim sien hoe bedroef sy is. “Geen tellings meer nie; almal moet gelyke punte hê en ‘n beurt kry om te wen,” gaan Gladdes voort. Nou is Pottie kwaad. “Dan sit ek nie my voet weer hier nie,” dreig hy. “Ons ook nie,” stem ‘n paar van die beter spelers saam. “Orde!” sê die voorsitter, maar niemand hoor nie. Almal praat gelyk.
Transformasie vir die nasie
Oudominee voel dis nou tyd vir leierskap: “Vrinne,” begin hy. “Gholfgenote.” Maar niemand luister nie. “Orde!” dreun Gladdes. Die saal word stil. Netnou maak Gladdes ‘n hofsaak, almal weet hy’s getroud met Kallie Kriel se een Tante. “Tweedens moet ons nuwe baanreëls instel wat bepaal wanneer, hoe ver en met watter stok geslaan kan word. Mense kan nie net aanhou maak wat hulle wil nie. So kan ons ongelykheid, dood en beserings voorkom.” “Maar dit sal nooit werk nie,” val die Voorsitter hom in die rede. “Niemand sal meer hier speel nie.” “Nonsens,” sê Felix, “As almal gelyk is en dieselfde punte kry, sal niemand uitgesluit wees nie en sal daar geen verloorders wees nie. Almal sal wil speel. Dís nou ware transformasie- vir die héle gholfnasie.”
Gladdes praat weer: “Derdens vereis geregtigheid dat hierdie gholfbaan van nou af behoort aan almal wat daarop speel, en dié wat dit nie kan bekostig nie, hoef nie meer speelgeld te betaal nie.” Oudominee knik gewigtig; hy wéét van geregtigheid.
Later die aand word Gladdes se Gholfakte op voorstel van Oudominee, gesekondeer deur Jongjuffrou, oorwéldigend aanvaar. Terwyl tant Koekie nog snik van aandoening, word die ou bestuur uitgestem en Gladdes, Felix en Jongjuffrou (as Sekretaresse) tot die bestuur verkies. Nog baie ander reëls word ingebring, en die beste spelers moet ook nou dubbeld betaal. Agttien baanbeamptes word aangestel om die nuwe reëls af te dwing.
Ongelukkig het die Gholfklub ‘n jaar later bankrot gespeel. Dit word nou vir gemeenskaplike weiding van die gemeenskap se vee gebruik ter viering van gelykheid. Pottie het intussen die nuwe kampioen van die buurdorp Gholfhoogte geword.
Wat is die Solidariteit Beweging?
Die Solidariteit Beweging, oorkoepelend oor verskeie instellings, bestaan uit sowat 500 000 gesinne en is die grootste hoofstroom-Afrikanerorganisasie én een van die grootste organisasies in ons land.
Die hoofdoelwit van die Beweging is om sy lede te help om ’n normale lewe in ʼn normale land te lei. Elk van die instellings of onafhanklike vennote wat deel uitmaak van die Beweging, vervul ’n unieke rol in die verwesenliking van hierdie doelwit. Tans bestaan die Beweging uit 21 instellings en onafhanklike vennote.
Lede-organisasies
- Die vakbond: Solidariteit
Solidariteit vervul die rol van ’n tradisionele vakbond, maar bied daarmee saam ’n breër netwerk van werk waarby enige werkende of voornemende werkende persoon kan inskakel. Weens die veranderende werkplek het die vakbond Beroepsgildes gestig met die doel om mense ten eerste op grond van hul beroep, eerder as hul werksplek, te organiseer en sodoende ook in kontak met ander werkendes binne en buite hul beroepsveld in verbintenis te plaas.
- AfriForum
AfriForum is ’n nieregeringsorganisasie wat ten doel het om minderhede se regte te beskerm. Hoewel die organisasie op die internasionaal erkende beginsel van minderheidsbeskerming funksioneer, het AfriForum ’n spesifieke fokus op die regte van Afrikaners as ’n gemeenskap aan die suidpunt van Afrika. AfriForum is dus die burgerregte-been van die Solidariteit Beweging.
- Solidariteit Helpende Hand
Solidariteit Helpende Hand is die Beweging se maatskaplike vleuel wat spesifiek fokus op die ontwikkeling van die Afrikanergemeenskap en die skep van ʼn maatskaplike struktuur wat die eise en uitdagings van kwesbare groepe (kinders, bejaardes en gestremdes) die hoof kan bied. Hulle probeer ook direkte nood sover moontlik verlig en geleenthede skep waar armoede voorkom kan word deur studie en opleiding.
- Die FAK
Die FAK is een van die oudste kultuurorganisasies – die oudste organisasie in die Beweging – met die federasie wat reeds in 1929 gestig is. Die FAK is ’n toekomsgerigte kultuurorganisasie wat ’n tuiste bied vir taal en kultuur, en die Afrikaner geskiedenis positief bevorder. Die FAK beoog om ’n kultuurtuiste vir Afrikaners te wees, Afrikaners te bemagtig om met trots hul identiteit uit te leef en op die uitbou en bevordering van die Afrikaanse taal en Afrikaner kultuur te fokus.
Onderwys en opleiding:
- Sol-Tech Beroepsopleidingskollege
Sol-Tech is ʼn geakkrediteerde, privaat beroepsopleidingskollege wat op Christelike waardes gefundeer is en Afrikaans as onderrigmedium gebruik.
- Akademia
Akademia is ʼn Christelike wêreldgehalte hoëronderwysinstelling wat op ʼn oop, onbevange en kritieke wyse ʼn rigtinggewende rol binne die hedendaagse universiteitswese speel. Dít alles ten gunste van die
Afrikaanse taal- en kultuurgemeenskap.
- Studiefondssentrum
Die Studiefondssentrum (SFS) is ’n onderafdeling van Solidariteit Helpende Hand en het spesifiek ten doel om rentevrye studielenings aan hulpbehoewendes te voorsien en sodoende almal die geleentheid te gee om hul tersiêre studies te voltooi. Die SFS vorm deel van Helpende Hand se strategie om armoede nie net te verlig nie, maar ook te verbreek deur hulle die geleentheid te gee om verdere opleiding te ontvang.
- Skoleondersteuningsentrum
Die Skoleondersteuningsentrum (SOS) is ’n privaat opleidingsinstansie gefokus op die professionele en persoonlike ontwikkeling van onderwysers in Suid-Afrika, die beskerming van Afrikaanse skole se regte én die ontwikkeling van oplossings vir probleme wat onderwys as ’n geheel in die gesig staar. Die SOS beoog om gesonde, volhoubare, bekostigbare, skaalbare, Christelike, Afrikaanse skole van wêreldgehalte daar te stel deur eerstens dít wat reeds bestaan en van wêreldgehalte is, in stand te hou en tweedens dít wat nou uniek nodig is, nuut te bou.
- Wolkskool
Wolkskool is die belangrikste en grootste produk van die innovasiespan van die SOS. Wolkskool is ’n volledige aanlyn skool wat aanvullend en verrykend tot bestaande skole aangewend kan word en wat gebruik kan word by plekke waar gehalte-onderrig in Afrikaans onder druk verkeer. Die uiteindelike doel van Wolkskool is om ’n volledige digitale Afrikaanse skoolkurrikulum, wat oor alle grade en vakgebiede strek, te bied.
- S-leer
S-leer bestaan as onderafdeling van die vakbond Solidariteit en dien as sentrum vir voortgesette leer en ontwikkeling om die werkende te help om sy of haar loopbaandoelwitte te bereik. S-leer vorm deel van Solidariteit se kernbesigheid, naamlik arbeidsverhoudinge, vaardigheidsontwikkeling en die breër netwerk van werk. S-leer dien as primêre diensverskaffer vir die Solidariteit Beroepsgildes en bied hul lede die geleentheid om hul vermoëns en vaardighede tot so mate te ontwikkel dat hulle ʼn goeie werk kan kry en behou en sodoende vry, veilig en voorspoedig kan lewe.
- De Goede Hoop
De Goede Hoop is ’n privaat Afrikaans-Christelike koshuis vir mans- en vrouestudente wat aan die Universiteit van Pretoria studeer. Die koshuis is in 2017 deur AfriForum tot stand gebring. De Goede Hoop is gestig om as ʼn kultuurinstelling te dien wat verblyf vir alle studente, wat gemaklik binne die Afrikaanse gemeenskap voel, te bied.
Taal en kultuur:
- Maroela Media
Maroela Media is ʼn Afrikaanse mediahuis wat daarna streef om die Afrikaanse gemeenskap
te bedien met nuus en ander inhoud wat van goeie gehalte is en wat betroubaar en
gebalanseerd is. Maroela Media is nie net die grootste Afrikaanse digitale platform nie, maar
is ook die grootste Afrikaanse mediagemeenskap van alle mediaformate – digitaal, koerante,
tydskrifte, televisie en radio ingesluit. Maroela het tans net meer as 2 miljoen unieke lesers
per maand en groei steeds.
- Forum Films
Forum Films is ’n volspektrum produksiehuis vir televisie, rolprentgrafika, animasie en vollengtefilms. Forum Films wat amptelik deur AfriForum op die been gebring is, is amptelik op 30 Augustus 2016 bekendgestel, met die idee van Forum Films wat reeds in 2012 gebore is. Forum Films word so ook gesien as ’n belangrike middel om weer eienaarskap te neem van ons geskiedenis en dit te normaliseer. Een van die kern doelwitte van Forum Films is dus om te help om die Afrikaanse taal en Afrikaner kultuur te bevorder.
- Kraal Uitgewers
Kraal Uitgewers is ’n klein, maar gespesialiseerde uitgewersmaatskappy wat hoofsaaklik
fokus op die publisering van gehalte nie-fiksie boeke wat binne die Afrikanergemeenskap of
onder ’n spesifieke teikengehoor waardevolle bydraes tot debatte maak oor onder meer
politieke, geskiedkundige, kulturele en maatskaplike kwessies in die land. Dié uitgewer het tydens die 100-jaar herdenking van die Anglo-Boereoorlog in 1999 ontstaan en aanvanklik gefokus op die publikasie van versamelaarsboeke oor dié oorlog.
Stigting, fondse, trusts en kapitaalmobilisering:
- Solidariteit Regsfonds
Die Solidariteit Regsfonds is die eerste van twee fondse wat deur die vakbond Solidariteit behartig en administreer word. Hierdie fonds het spesifiek ten doel om deur bepaalde regsaksies beleide, projekte of besluite van die regering wat gewoonlik teen die belange van minderhede is, teen te staan. Hoewel die Regsfonds spesifieke klem lê op die teenstaan van beleide wat vir minderhede skadelik is – soos die SEB-beleid – pak die vakbond dikwels sake aan wat nie net in die belang van lede en minderhede is nie, maar ook in die belang van die breër publiek.
- Solidariteit Boufonds
Die Solidariteit Boufonds is die tweede fonds wat deur die vakbond Solidariteit behartig en administreer word. Die Solidariteit Beweging bou aan ’n beter samelewing en beter toekoms vir toekomstige generasies. Die Solidariteit Boufonds is een van die maniere waarop daar baie letterlik aan die toekoms gebou word. Dit vind plaas deur die bydraes aan die Boufonds wat die oprig van verskeie kulturele infrastrukture befonds.
- Geskiedenisfonds
Die Geskiedenisfonds is onder bestuur van die FAK. Die Geskiedenisfonds het spesifiek ten doel om by te dra tot die ondersteuning, bewaring en normalisering van Afrikanergeskiedenis. Die FAK het in 2016 die Geskiedenisfonds gestig ter ondersteuning van die reeks geskiedenisprojekte wat die FAK in daardie jaar geloods het, wat op die beskerming en bewaring van Afrikanergeskiedenis gefokus het.
- Die Virseker-trust
Die Virseker Trust het gevloei uit ’n samewerkingsooreenkoms tussen Virseker, as deel van Auto & General, en die Solidariteit Beweging waar verteenwoordigers van Solidariteit as trustees dien. Die oogmerke van die Virseker Trust is om Afrikaners die geleentheid te bied om deur middel van die gebruik van ’n diens in die privaatsektor terselfdertyd te belê in spesifiek opleidingsprojekte vir die Afrikaanse gemeenskap. Die Virseker Trust is sodoende daarop uit om Afrikaner-koopkrag te mobiliseer.
- De Kock-trust
Die Arend Josias de Kock-trust is in 1863 tot stand gebring met die geboorte van Arend Josias de Kock en amptelik geregistreer in Januarie 1998 deur sy kleinseun. Hierdie Trust is aanvanklik deur Arend Josias de Kock gestig met die doel om hul familie se geld nie vir eie gewin aan te wend nie, maar dit eerder in ’n trust te belê wat daarop uit is om die Afrikanergemeenskap by te staan deur skenkings aan bepaalde projekte van die gemeenskap te maak.
- Kampus-trust
Die Kampus Trust is daarop uit om ’n skenkingsfonds te wees wat spesifieke klem lê op die oprig van Afrikaanse opleidingsinstellings. Meer spesifiek fokus die Trust daarop om ’n volhoubare model te voorsien om skenkings te werf, uit te bou en aan te wend ten behoewe van die onderwys- en opleidingsinstellings van die Solidariteit Beweging – waaronder Akademia, Sol-Tech en die Skoleondersteuningsentrum.
- Kanton Beleggings
Kanton is die beleggingsmaatskappy vir eiendomme wat deur die Solidariteit Beweging gestig is. Die eiendomme van die Solidariteit Beweging dien as basis van die portefeulje wat verder deur ontwikkeling uitgebrei sal word. Kanton is ʼn vennootskap tussen kultuur en kapitaal en fokus daarop om teen ʼn goeie opbrengs volhoubare eiendomsoplossings aan instellings in die Afrikaanse gemeenskap te voorsien sodat hulle hul doelwitte kan bereik. Kanton het uiteindelik ten doel om in die vennootskap tussen kultuur en kapitaal fisiese leefruimtes te skep waarin Afrikaans kan floreer.
Onafhanklike vennote:
- SAAI
Die Suider-Afrika Agri Inisiatief (SAAI) is ’n landboubelangenetwerk vír boere déúr boere, wat daartoe verbind is om die regte, waardes, ideale en behoeftes van familieboere in die primêre produksiesektor te beskerm en te bevorder. As belangenetwerk speel SAAI ’n aktiewe rol in die uitvoer van daadwerklike strategiese oplossings vir landbou-probleme wat boere daagliks ervaar en beoog hulle om nie bloot te berus by die hoop van beleidsbeïnvloeding nie.
- Pretoria FM
Pretoria FM, die voormalige Radio Pretoria, is ’n selfstandige en onafhanklike gemeenskapsgebaseerde radiostasie gevestig in Pretoria, Suid-Afrika. Die reikwydte van Pretoria FM se uitsaaitorings is sowat 2 miljoen Afrikaanssprekendes. Pretoria FM behartig talle projekte ter bevordering van die Afrikaanse taalgemeenskap en die Afrikaner kultuurgemeenskap.
Beweging-krisisfonds steek die drie miljoen rand kerf verby – Gemeenskap skenk hul “twee hoenders”
Die krisisfonds wat deur die Solidariteit Beweging van stapel gestuur is om gemeenskappe tydens die Covid-19 krisis by te staan, het op die oggend van 9 April reeds R3 mljoen sterk gestaan.
Dit volg nadat die Beweging ’n gesamentlike Helpmekaardag op 7 April geloods het, waarby instellings soos Solidariteit, Helpende Hand, AfriForum, die FAK, Akademia en die Skoleondersteuningsentrum onder andere kragte saamgespan het om die fonds so sterk as moontlik te maak.
Volgens Dirk Hermann, bestuurshoof van Solidariteit, herinner hierdie aksie aan die helpmekaar aksie van sowat ’n honderd jaar gelede waar gewone mense bygedra en saamgewerk het om gemeenskaplike nood te verlig.
Almal was in nood, maar almal het ingespring en gehelp. ’n Bankrot boer het twee hoenders gegee met die woorde: “…ik is geheel uitgeboer en dit is alles wat ik kan gee.”
Hermann se boodskap was: “Ons gaan almal onseker wees. Ons gaan almal swaarder kry, maar juis daarom moet ons mekaar help. Dis tyd dat ons moet saamdra en saamwerk. Dis tyd dat ons ons twee hoenders gee.”
Volgens Francois Redelinghuys, kommunikasiebestuurder van die Solidariteit Beweging, is die organisasie oorstelp en verheug deur die ongelooflike ondersteuning wat hierdie fonds oor die afgelope twee dae vanaf die sakegemeenskap en gewone mense ontvang het. “Allerlei skenkings is vanaf verskeie oorde gemaak. Van groot skenkings deur die Virseker Trust en Sakeliga, tot klein bydraes van gewone mense wat saam ’n reuse-verskil maak,” het Redelinghuys gesê.
Hierdie fonds, sal veral aangewend word deur Solidariteit Helpende Hand om weerloses soos ouer mense en kinders, wat weens die uitbreek van die koronavirus uitgelewer is, by te staan. Voorts sal die fonds ook gebruik word om te verseker dat skoolgaande kinders soomloos kan voortgaan met hulle onderrig deur middel van die Wolkskool-platform wat deur die Skoleondersteuningsentrum (SOS) gratis aan leerders beskikbaar gestel is.
“Die krisis is nog nie verby nie, en die kruin kom nog. Dus gaan die Beweging nie stop om so veel te doen as wat hy kan om die nood te verlig nie. Hierdie fonds sal nog ’n baken van hoop vir ons gemeenskap wees,” het Redelinghuys gesê.
Skenkings kan hier gemaak word: www.krisisfonds.co.za
2020 is die jaar van bou en beskerm
Flip Buys, voorsitter van die Solidariteit Beweging, het onlangs gestel dat die begin van hierdie jaar nie gekenmerk word deur die positiwiteit waarmee die aanbreek van ʼn nuwe dekade gewoonlik begroet word nie. Hoewel mense bekommerd is oor die komende jaar kan ons dit nie bekostig om die agteruitgang in gelatenheid te aanvaar nie. Buys verduidelik hoe ons in 2020 dít wat belangrik is, moet bewaar en die toekoms wat ons wil sien, gaan uitbou.
Talle aspekte van ons lewens moet teen ons sosialistiese regering beskerm word en daarvan is die markekonomie die eerste. Kapitalisme handel in wese oor die vryheid om te produseer en te verbruik wat jy wil. Die ANC wil egter die vrye mark bestuur en besit deur aan 56 miljoen mense aalmoese te belowe, maar wil slegs 3 miljoen belastingbetalers vir die befondsing daarvan gebruik. Ons moet meer aanvallend begin optree teen dié versmoring van die vrye mark.
Ons moet gesondheidsorg beskerm teen nasionalisering. Suid-Afrika het nie ʼn mediese krisis nie, maar eerder ʼn ekonomiese krisis wat getakel moet word. Daarom moet ons die privaat sektor bewaar, die ekonomie laat groei en die regering se inmenging in nóg ʼn aspek van ons lewens beveg.
Afrikaners se geskiedenis moet beskerm word teen diegene wat dit wil kriminaliseer. Ons voorouers was gewóne mense wat in ongewone omstandighede buitengewone prestasies behaal het. Hulle was nie uitsluitlik goed of boos nie. Die regering se geheue oor die verlede is egter veel sterker as hul visie vir die toekoms en hul vertolking van die verlede beïnvloed hul beleid vir die toekoms. Dit is daarom ons verantwoordelikheid om ʼn eerlike opvatting van die verlede te bewaar, terwyl ons ons toekoms voortbou.
Namate die staat misluk, moet ons ook alternatiewe bou. Die alternatief vir die agteruitgang van openbare onderrig is wêreldklas- private onderrig. Daarom word Sol-Tech en Akademia gebou as privaat alternatiewe vir tersiêre opleiding. In die lig van die verval van openbare onderwys beoog die Skoleondersteuningsentrum (SOS) se Wolkskool ook om gevorderde tegnologie te gebruik as bekostigbare private oplossing om gehalteonderrig te kan bied.
Een van die belangrikste aspekte waaraan daar gebou moet word, is die Afrikaner se kulturele selfvertroue. ʼn Mens hoor bykans net van dit alles wat sleg is aan Afrikaners. Dit is egter belangrik om eerlik te wees oor ons geskiedenis in die konteks van die tyd en te verstaan dat elke geslag verantwoordelik is vir sy éie tydperk. So ook moet ons verantwoordelikheid neem vir óns tydperk, meer van onsself verwag, ons moue oprol en dit bou wat ons tot stand wil bring. Ons moet die nodige selfvertroue aan die dag lê om onsself op die regte manier te laat geld en die kulturele infrastruktuur te bou wat noodsaaklik is vir ons voortbestaan –dít terwyl goeie verhoudinge met ander gemeenskappe en mense behou word.
Luister hier na hoe Buys dié 2020-strategie onlangs op Pretoria FM verduidelik:
