April 7, 2020 - Solidariteit Beweging

Beste vriende, kollegas en makkers

Skenk jou twee hoenders en help mekaar in die koronakrisis

Môre, 7 April 2020, hou die Solidariteit Beweging ŉ helpmekaardag. Die eerste mylpaal is om R2 miljoen in te samel vir mense wat in maatskaplike nood verkeer en om kinders te help om skool te gaan in die krisistyd. Mense is onseker, wonder oor die toekoms en is bekommerd oor hul werk, maar juis in hierdie tyd word dit ŉ helpmekaartyd.

10 November 1917 was ook ŉ helpmekaardag. Dit was die hoogtepunt van die Helpmekaarbeweging ná die Rebellie van 1914. Ná die Rebellie was die land deur absolute armoede en swaarkry getref. Die rebelle moes boetes en skadevergoedingseise betaal.

Veral die Vrystaters was swaar getref. Op Bethlehem is besluit: “Ons moet saamdra en saamwerk” om die nood te verlig. Later het die besluit tot die Helpmekaarbeweging gelei. Die Bethlehem-besluit het vlam gevat in die res van die Oos-Vrystaat en toe versprei na die hele Vrystaat, die Transvaal en die Kaap. Die koerant, Die Burger, het ingespring met ŉ reuse-insamelingspoging. Almal was arm, maar almal het mekaar gehelp. Basaars is gehou. Bedags was vroue se tafels naaldwerkplekke en saans ŉ bakkery. Baie mense het bietjies gegee. Kerke het van deur tot deur geloop om geld te kollekteer. Jongmense het debatsaande gehou en donasies gevra. Gesinne het sonder vleis en suiker klaargekom om die geld wat so gespaar is, te skenk. Kinders het hul sakgeld gebruik om by te dra. ŉ Bankrot boer het twee hoenders gegee met die woorde: “Ik is geheel uitgeboer en dit is alles wat ik kan gee.”

Op 8 November, twee dae voor die destydse Helpmekaardag, was genoeg geld ingesamel om al die rebelle se skuld te betaal. Aan vandag se waarde gemeet, is meer as R150 miljoen in vier maande deur mense in nood, vir ander in nood, ingesamel. Dit was ŉ inspirerende prestasie.

In wat daarop gevolg het, het ŉ gees van helpmekaar posgevat. Instellings soos Sanlam, Santam en Volkskas is gestig. ŉ Volk het vir homself en vir mekaar opgestaan.

In 2020 word Suid-Afrika getoets deur een sy grootste uitdagings nóg vir hierdie geslag. Wêreldwyd word die mensdom geskud met meer as ŉ miljoen mense wat die virus het en die ekonomie wat inplof. Angela Merkel, kanselier van Duitsland, bestempel dit as die grootste krisis sedert die Tweede Wêreldoorlog. Niemand weet nog hoe dit gaan uitspeel nie. Daar is egter instemming dat Suid-Afrika nog maar aan die begin van die krisis is.

Wat ons klaar sien, is dat die staat van inperking reeds sy tol begin eis. Daar is reeds mense in maatskaplike nood. Salarisse is nie betaal nie. Hulp is afgesny. Mense het reeds hul werk verloor. Ouer mense is alleen en talle sukkel om gesond te eet. Kinders wat by skole kos gekry het, is skielik sonder kos. Daar is skielik onmiddellike nood en die ergste lê nog voor. Die Solidariteit Helpende Hand klim in en help. Hulle het reeds R750 000 se hulp uitgedeel en vestig “Josef Silo’s’ landswyd waar mense kan gaan kos skenk.

Behalwe die maatskaplike nood is daar skielik ook ŉ onderwysnood. Kinders is nie in die skool nie. Solidariteit se Skoleondersteuningsinisiatief, Wolkskool, ondersteun leerlinge om met hul skoolwerk te kan aangaan. Duisende matrieks kan voortgegaan met ŉ matriekskool. China mag wel binne dae ŉ hospitaal midde-in die koronakrisis gebou het, maar die Solidariteit Beweging het binne dae ŉ matriekskool gebou. Altesaam 53 000 leerlinge het vir Wolkskool geregistreer. Hierdie inisiatief moet dringend radikaal uitgebrei word.

Kleinsake is onder druk en die Solidariteit Beweging het begin om mense aan te moedig om kleinsake te ondersteun. AfriForum het ŉ netwerk van kleinsakeondernemings gevestig en moedig mense aan om hulle te steun. Die beste manier om te help is om koopkrag te mobiliseer.

In die lig van die nood wat besig is om te ontstaan, het die Solidariteit Beweging ŉ noodfonds begin om die maatskaplike nood en die onderwysnood die hoof te bied.

7 April is ŉ helpmekaardag midde-in die koronakrisis. Die doel is om geld vir die noodfonds in te samel. Dit is die begin van ŉ reuse-helpmekaarpoging. In die tye wat voorlê, gaan ons mekaar moet help. Ons gaan almal onseker wees en ons gaan almal swaarder kry, maar juis daarom moet ons mekaar help. Dit is tyd dat ons moet saamdra en saamwerk. Dit is tyd dat ons ons twee hoenders gee.

Die staat gaan ons nie deur die krisis dra nie. Ons gaan mekaar moet dra.

Die Virseker Trust het R1 miljoen aan die Solidariteit Beweging se noodfonds geskenk. Op 7 April is ons eerste mylpaal om minstens nog R1 miljoen bo en behalwe Virseker se miljoen uit die gemeenskap in te samel. Almal moet net hul bietjies vir mekaar gee.

Kom ons roep mekaar op om daar te wees vir mekaar en skenk ons twee hoenders.

Groete

Dirk Hermann

Die Solidariteit Beweging, hou vandag 7 April 2020 ’n aanlyn Helpmekaar-dag. Die doel van die dag is om ’n reuse-helpmekaarpoging te loods deur die krag van die gemeenskap in te span om mense in maatskaplike nood te help, om besighede te ondersteun en om kinders te help sodat hulle steeds kan skoolgaan gedurende hierdie onsekere tye. Die dag sal ten bate van die Solidariteit Beweging se krisisfonds wees.

Volgens Flip Buys, voorsitter van die Solidariteit Beweging, is die Beweging daarop gegrond om ’n Helpmekaar-Beweging te wees en moet gemeenskappe nou midde-in die koronakrisis saamstaan. “Dit is die begin van ŉ helpmekaarpoging. In die tye wat voorlê, gaan ons mekaar moet help en die Beweging sal al sy instellings inspan om dit te vermag,” het Buys gesê.

Volgens Hannes Noëth, uitvoerende hoof van Solidariteit Helpende Hand, is die maatskaplike nood wat weens die koronavirus ontstaan het reeds yslik en moet gemeenskappe nou saamstaan om die krisis die hoof te bied. Die organisasie word oorval deur versoeke en help reeds duisende kleuters, gesinne en oumense om daagliks kos en ander hulp te ontvang. Volgens Noëth het die organisasie net in Maart reeds R753 739 aan noodprojekte bestee, en daarom is die versterking van die krisisfonds noodsaaklik.

Volgens Dirk Hermann, bestuurshoof van Solidariteit is die krisis nog nie op sy kruin nie. Intussen het 53 000 leerlinge reeds op die Skoleondersteuningsentrum se Wolkskool geregistreer om aanlyn te kan voortgaan met hul onderrig. “Die staat gaan ons nie deur die krisis dra nie, ons gaan mekaar in hierdie tyd moet dra. Alhoewel ons almal onseker is moet ons juis daarom mekaar help. Dis tyd dat ons moet saamdra en saamwerk, want ons kan nie toelaat dat weerloses en kinders in hierdie tyd agtergelaat word nie,” het Hermann gesê.

Op dié Helpmekaar-dag gaan daar ook ŉ beroep op die gemeenskap gedoen word om klein- en mediumsakeondernemings te help. Volgens Kallie Kriel, uitvoerende hoof van AfriForum, lê die beste hulp aan sakeondernemings in die koopkrag van verbruikers. Duisende sakeondernemings het reeds by AfriForum se sakenetwerk by afriforumnetwerk.co.za geregistreer. Ondernemings word aangemoedig om by die netwerk te registreer sodat mense aangemoedig kan word om by hulle te koop.

Ondersteuners kan hier, tot die krisisfonds bydra.

Sakeondernemings kan hier registreer vir die AfriForum-sakenetwerk.