Ná twee sluipmoordpogings, Covid-19, ʼn skielike verandering van presidensiële kandidaat, vele nuuswaardige debatte, twee reuse-orkane en ʼn besoek aan McDonald’s, is ons uiteindelik op die vooraand van die Amerikaanse verkiesing.
Dié tuimeltrein van gebeure die afgelope paar maande in Amerika laat Gold Reef City se Tower of Terror soos kinderspeletjies lyk.
Dit is nie aldag ʼn maklike taak om betroubare en georganiseerde inligting te bekom nie, veral te midde van talle menings, beeldmateriaal-flitse, verwronge waarhede en teorieë wat op sosiale media en in die media versprei word.
Dit is dan wanneer Suid-Afrikaners met dankbaarheid staatmaak op kenners soos Jaco Kleynhans wat sy diepgaande kennis op ʼn georganiseerde, verstaanbare wyse in Afrikaans met die publiek deel.
Jaco is die hoof van internasionale skakeling by die Solidariteit Beweging en beskik oor jare se kennis en ondervinding van internasionale politiek. Hy was self eens deel van ʼn Amerikaanse verkiesingsveldtog vir George W. Bush.
In sy podsending, Wêreldwys, in samewerking met Maroela Media, gesels Jaco tweeweekliks oor die belangrikste wêreldgebeure waarvan Suid-Afrikaners moet kennis neem. Verder verskyn sy artikels gereeld in Rapport en gesels hy op talle radiostasies oor wêreldgebeure.
Wanneer die Amerikaanse verkiesing op 5 November plaasvind, sal Jaco in Amerika wees om vir Suid-Afrika eerstehandse inligting te stuur. Daarna toer hy vir drie weke onder meer deur Michigan, Wisconsin en Texas om Suid-Afrika en die Solidariteit Beweging se sake met belanghebbendes te bespreek.
Jaco antwoord ʼn paar vrae oor die verkiesing, waarom Suid-Afrikaners op hoogte moet wees van die jongste nuus en wat die uitslag van die verkiesing vir Suid-Afrika inhou.
Die belangrikste vraag eerste: Wie dink jy gaan die verkiesing wen?
As ek ʼn raaiskoot kan waag, sal ek voorspel dat Trump gaan wen. Trump is in ʼn sterker posisie in die peilings as in 2016 en 2020, maar ook in terme van Amerikaners se persepsie van hom, sy beleid en sy persoonlikheid. Kamala Harris word deur baie Amerikaners as té ekstreem beskou en ook as iemand wat bloot die Biden-beleid sal voortsit. Trump behoort te wen, maar dit kom uiteindelik alles neer op wie gaan stem. In die VSA stem hoogstens tweederdes van kiesers. Daardie derde wat tuisbly, kan ʼn kandidaat se oorwinning kos.
Watter voordele hou dit vir Suid-Afrika in sou die Republikeinse party wen?
ʼn Trump-oorwinning kan groot ekonomiese geleenthede én risiko’s meebring. Die grootste geleenthede is vir handel, aangesien Trump groot stappe teen China beplan. Dit skep nuwe geleenthede vir Suid-Afrika om nóg meer produkte na die VSA uit te voer.
Republikeine, Trump en die verlede het reeds gewys dat daar groot geleenthede vir Afrikaners bestaan indien die Republikeinse party wen, aangesien hulle dikwels meer geneig is om die ANC se beleid teenoor minderhede, veral Afrikaners, asook die ANC se denke oor sosialisme en simpatie met byvoorbeeld Rusland, Iran, Kuba en Venezuela, te veroordeel.
Skakel die Solidariteit Beweging eerder met die Republikeine of die Demokrate?
Ons skakel met beide Republikeine en Demokrate, en het geen motief om kant te kies nie. Ek sal oor die volgende drie weke met lede van beide partye regoor Amerika en veral in Washington DC ontmoet. In die Amerikaanse kongres is daar baie Republikeine en Demokrate wat in die gebeure in Suid-Afrika belangstel en met wie ons reeds goeie kontakte opgebou het.
Behalwe vir persoonlike nuuskierigheid en vermaaklikheidsredes, hoekom dink jy is dit belangrik dat Suid-Afrikaners op hoogte bly van die politieke gebeure in Amerika?
Amerika is steeds die magtigste supermoondheid in die wêreld en dit gaan nog vir ʼn hele paar jaar die geval wees. Suid-Afrika is ekonomies baie afhanklik van handel met die VSA en van beleggings uit dié land. Wat in Amerika gebeur, raak ons almal omdat dit ʼn invloed op ons wisselkoers sowel as kommoditeitspryse, handelsbetrekkinge en globale politieke en ekonomiese veranderlikes het.
Waar kan Suid-Afrikaners inskakel om eerstehandse inligting van jou te kry oor die verloop van die verkiesing?
Die Suid-Afrikaanse media, en veral die Afrikaanse media, doen baie moeite om behoorlik oor die Amerikaanse verkiesing te berig. Ek sal self voor en ná afloop van die verkiesing op Maroela Media, Pretoria FM, RSG, Nuuspod en ander Afrikaanse media hieroor berig. Daar sal dus ʼn goeie aanbod van nuus oor die verkiesing in ons eie Afrikaanse media wees.
Vertel ʼn bietjie meer oor die res van jou besoek en die hoogtepunte waarna jy uitsien.
Ek werk die afgelope twee jaar aan bande met wetgewers in verskillende deelstate. Ons is op die punt om belangrike resolusies in wetgewers in sommige deelstate in te stel. Dit kan verrykende gevolge hê.
Verder het ons baie goeie kontakte in Washington DC by die kongres en by organisasies wat politieke beleid beïnvloed. Ek gaan hier met tientalle invloedryke persone skakel oor verskeie kwessies soos die regering van nasionale eenheid (RNE), Agoa, die posisie van minderhede in Suid-Afrika, die Bela-wet, die beplande NGV, misdaad, Brics, die ANC se bande met Rusland, China en Iran, en die werk van die Solidariteit Beweging.
