Graad 1-leerders van nagenoeg 130 skole landwyd het die nuwe skooljaar met ʼn breë glimlag afgeskop ná hulle skooltassies propvol skryfbehoeftes ontvang het.
Solidariteit Helpende Hand dryf jaarliks die skooltassie-projek, wat behoeftige kinders reeds vir 18 jaar met ʼn skooltas, gevul met al die nodige skryfbehoeftes vir die eerste jaar van hulle skoolloopbaan, toerus.
Alhoewel baie van die tassies verlede jaar uitgedeel is, het Helpende Hand Woensdag (17 Januarie) ʼn simboliese uitdeeldag by Laerskool Saamspan in die weste van Pretoria gehou. Die organisasie se gelukbringer, Braaf die Boerboel, het sommer ook sy spiere ingespan om van die tassies aan leerders te oorhandig.
“Ons missie is om kinders ʼn gelyke kans te gee op sukses deur hulle met die regte gereedskap te bemagtig. Hierdie tassies is meer as net houers – dit is ʼn simbool van hoop, selfvertroue en die moontlikheid van ʼn blink toekoms,” sê Danelle du Plessis, die organiseerder van die projek.
Elke tassie bevat ʼn pennesakkie, grys potlode, inkleurpotlode, uitdraaikryte, ʼn skêr, uitveër, gom, liniaal, witbordjie en witbordpenne. Elke tassies bevat ook ʼn Christelike leesboekie.
Met die ondersteuning van verskeie borge soos Pretoria FM, Boerboel Wear, Lig in Duisternis Uitgewers (verskaffers van die Witrokkie-boekie) BIC (verskaffer van HB- en inkleurpotlode), Finesse Voelgoed Media (skenking van kontant) en KIMOsource (verskaffers van liniale), was die dag ʼn feestelike geleentheid.
Leerders het hul tasse met groot opgewondenheid ontvang en is nou gereed om hul akademiese reis te begin.
Die “Witrokkie”-boekie verskaf deur Lig in Duisternis Uitgewers is by elke tassie ingesluit. (Foto: Verskaf)
Die projek is oor die jare moontlik gemaak danksy vrygewige donasies van die publiek en die betrokkenheid van plaaslike gemeenskappe. Helpende Hand nooi alle Suid-Afrikaners om deel van hierdie inisiatief te word deur ʼn skooltassie te skenk en só die lewe van ʼn kind te verander.
Vir meer inligting of om by te dra, besoek Solidariteit Helpende Hand se webwerf by Tassie.co.za.
