Die Solidariteit Beweging het ’n uitgebreide besoek aan die Verenigde State van Amerika (VSA) afgeskop. Volgens Flip Buys, voorsitter van die Solidariteit Beweging, het die tyd vir gemeenskapsdiplomasie aangebreek.
Volgens Buys is die regering en die ANC aandadig aan die swak diplomatieke verhoudings tussen Suid-Afrika en die VSA, en kan hulle nie meer vertrou word om dit alleen te hanteer nie. Die land is te belangrik om dit net in hulle hande te los.
Die doel van die besoek is om in te tree vir die land, die ekonomie en die werkende mense. Die Solidariteit Beweging gaan in die komende weke verskeie rolspelers in die Amerikaanse regering op federale- en deelstaatsvlak besoek.
Die Solidariteit Beweging het voor die besoek verskeie skrywes aan die Suid-Afrikaanse regering gestuur, insluitend president Ramaphosa, in ’n poging om ʼn gesprek te voer oor die diplomatieke krisis, die gevolge daarvan en moontlike oplossings. Dit was egter onsuksesvol.
Hierdie besoek volg ná ’n jaar waarin die ANC-regering die verhouding met die VSA – die wêreld se grootste moondheid en Suid-Afrika se belangrikste handelsvennoot – ernstig beskadig het.
Die gevolge van dié vervreemding word tans gevoel deur gewone mense in Suid-Afrika, wat reeds gebuk gaan onder ’n verswakkende ekonomie.
Volgens Buys heers daar groot kommer oor Suid-Afrika se diplomatieke infrastruktuur.
“Soos talle ander infrastruktuur in die land het die regering se diplomatieke infrastruktuur ingeplof. Voorheen het Suid-Afrika diplomatieke infrastruktuur tot op deelstaatvlak gehad, maar nou is daar nie eers ’n ambassadeur nie en die spesiale gesant het nie eens ’n visum nie. Die vraag is nie wat maak die Solidariteit Beweging in die VSA nie, maar waar is die regering?” het Buys gesê.
Teenoor hierdie vervalle staatsdiplomasie het die Solidariteit Beweging oor die jare heen gemeenskapsdiplomasie beoefen, betroubare verhoudings in die VSA opgebou en geloofwaardigheid gevestig deur die opbouende rol wat ons instellings in Suid-Afrika speel. Dit skep ’n unieke geleentheid om ’n positiewe alternatief te bied in die lig van die vervalle staatsverhoudinge wat tans bestaan.
Vroeër vanjaar het kongreslid Ronnie Jackson van Texas ’n wetsontwerp ingedien om die VSA se verhouding met Suid-Afrika te hersien. Die redes hiervoor het ingesluit die regering se toenemende bande met vyandige state, sy regstreekse skakeling met terreurorganisasies soos Hamas, sy openlike vyandigheid teenoor Israel, die diepgewortelde korrupsie onder senior ANC-leiers, en die ernstige menseregteskendings wat in Suid-Afrika voortduur.
Die ANC is verantwoordelik vir die swak diplomatieke verhoudings. Hulle kan nie meer vertrou word om dit alleen te herstel nie. Die privaat sektor en burgerlike samelewing moet ’n baie groter rol speel. “Waar die regering verhoudings versuur en die land se ekonomiese toekoms in gevaar stel, bou die Solidariteit Beweging brûe, skep ons oplossings en herstel ons hoop,” het Buys gesê.
Solidariteit en AfriForum gaan elk ’n spesifieke fokus tydens die toer hê en sal afsonderlik daaroor kommunikeer.
