Volksmoord en sanksies
Ons wil dit duidelik stel dat ons nooit bewerings van ʼn “volksmoord” van wit mense in Suid-Afrika gemaak het nie. Ons het nie gevra vir sanksies teen Suid-Afrika nie. Ons het nie gevra dat die VSA enige fondse aan Suid-Afrika afsny nie. Ons het uitdruklik gevra dat Suid-Afrika nie uit Agoa geskop word nie omdat dit duisende Suid-Afrikaners hulle werk sal kos. As patriotiese Suid-Afrikaners het ons ʼn beroep op die VSA gedoen om nie die mense van Suid-Afrika te straf as die Trump-administrasie kwaad is vir die ANC nie.
Ons is lief vir die land en sy mense, al stem ons nie met die ANC se beleid en optrede saam nie. Hoewel ons gewaarsku het oor die gevare van die Onteieningswet, het ons nie bewerings teenoor die Amerikaanse regering gemaak dat grootskaalse onteiening sonder vergoeding reeds in Suid-Afrika plaasvind nie.
Die Solidariteit Beweging was verlede jaar deel van ʼn groep van ongeveer twee miljoen Afrikaners wat ʼn verklaring ondersteun het waarin ons ons lojaliteit aan die land en sy mense beklemtoon en waarin ons terselfdertyd voorstelle gemaak het oor die voorwaardes wat Afrikaners benodig om in die land te bly om ʼn blywende bydrae tot Suid-Afrika te maak. Die ANC het hierdie opbouende voorstelle geïgnoreer.
Suid-Afrikaanse oplossings
Ons verwerp die ANC se skynheilige uitsprake dat ons probleme intern in Suid-Afrika moet uitsorteer eerder as om in die buiteland daaroor te kla. Die ANC het met die Bela-onderhandelinge duidelik gewys dat hulle nie bereid is om die grondwetlike voorsiening vir Afrikaanse onderwys te respekteer nie. Hulle weiering om in goeie trou Suid-Afrikaanse oplossings te vind vir grondliggende sake wat die voortbestaan van ons taal en kultuur ten diepste raak, laat ons met geen keuse nie as om ons saak te internasionaliseer nie.
Ons vra niemand se toestemming om ons fundamentele menseregte en regmatige belange te verdedig nie omdat die ANC oor en oor bewys het dat hulle nie daarmee vertrou kan word nie.
Ons sal voortgaan om dit feitelik en ewewigtig te doen om nie die land skade te berokken nie, anders as die ANC wat voortgaan om die land te wanbestuur, korrupsie te laat gedy en die armoede en werkloosheid in die land nog verder te vererger.
