Flip het sy loopbaan as ʼn arbeidsverhoudinge-beampte by Eskom begin. In 1990 het hy na aanleiding van die veranderings in die land besluit om by die Mynwerkersunie (MWU) aan te sluit om te help om ʼn sterk Afrikaner-beweging te bou. Tydens sy honneursstudie in arbeidsverhoudinge het Flip ʼn studie van internasionale vakbonde begin maak. Hy het gekyk na die rol wat Christelike vakbonde in Europa gespeel het om hul lande ná die Tweede Wêreldoorlog weer op te bou. Hy het ook die rol wat die Poolse antikommunistiese vakbond Solidariteit in die val van die kommunisme gespeel het ondersoek. Hy het veral belanggestel in die Israelse vakbondbeweging, die Histadrut. Ná ʼn besoek aan Israel en ontmoetings met die Christelike vakbondbewegings in Nederland en Vlaandere, was hy daarvan oortuig dat die MWU tot ʼn familie van organisasies uitgebou kon word om Afrikaners en Afrikaans in ʼn nuwe, ANC-oorheersde bedeling te beskerm.

Ná sy verkiesing as hoof van die MWU het hy begin om ʼn sterk span leiers byeen te bring om hierdie strategie stelselmatig in praktyk te omskep. Sy resep was “skeppende vernuwing gegrond op beproefde waardes.” Die eerste stap het behels om die MWU tot Solidariteit uit te bou deur die organisasie te herskep, te moderniseer en na die hele werksmag uit te brei.Daarna is Solidariteit tot die Solidariteit Beweging uitgebou met organisasies op werks-, burgerregte-, Afrikaanse taal en kultuur-, maatskaplike, finansiële en opleidings- en mediagebied